تايلاند سوتى پرەمەر-ءمينيستردى قىزمەتىنەن بوساتتى
بانگكوك. KAZINFORM - تايلاندتىڭ كونستيتۋتسيالىق سوتى Phya Thai پارتياسىنان شىققان پرەمەر-مينيستر سەتتحا تحاۆيسيندى ەتيكا كودەكسىن بۇزدى دەپ ايىپتاپ، قىزمەتىنەن شەتتەتتى. سوتتىڭ ءتيىستى شەشىمى جاريالاندى، دەپ حابارلايدى Bangkokpost.
توعىز سۋديانىڭ بەسەۋى ۇكىمەت باسشىسىنىڭ وتستاۆكاعا كەتۋىنە داۋىس بەردى. سۋديالار تحاۆيسيندى 2024-جىلدىڭ ساۋىرىندە پحيچيت چينباندى مينيستر ەتىپ تاعايىنداۋ كەزىندەگى زاڭ بۇزۋشىلىقتار ءۇشىن كىنالى دەپ تاپتى.
- بۇل Phya Thai پارتياسىنىڭ كەدەرگىلەرگە تاپ بولۋى ءبىرىنشى رەت ەمەس. ءبىراق ءبىز جۇمىستى جالعاستىرامىز. ءبىز كەدەرگىلەرگە كەز بولعان سايىن توقتامايمىز. ءبىز العا باسامىز، - دەلىنگەن پارتيا مالىمدەمەسىندە.
پرەمەر-مينيسترمەن بىرگە ونىڭ كابينەتى دە وتستاۆكاعا كەتەدى.
پرەمەر-ءمينيستردىڭ ورىنباسارى جانە ساۋدا ءمينيسترى پحۋمتحام ۆەچايچاي ۋاقىتشا ۇكىمەتتىڭ باسشىسى بولادى دەپ كۇتىلۋدە. وكىلدەر پالاتاسىنىڭ (پارلامەنتتىڭ تومەنگى پالاتاسى) مۇشەلەرى ەندى 2023-جىلعى پارلامەنتتىك سايلاۋدان كەيىن پارتيالار بۇرىن ۇسىنعان كانديداتتار تىزىمىنەن جاڭا پرەمەر-ءمينيستردى قاراپ، بەكىتۋى كەرەك.
تايلاندتىق ب ا ق تحاۆيسين ۇكىمەتىندە ىشكى ىستەر مينيسترلىگىن باسقارعان انۋتين چانۆيراكۋن جەتەكشىلىك ەتەدى دەپ بولجايدى.
ەگەر پارلامەنت مۇشەلەرى كانديداتتار اراسىنان پرەمەر-ءمينيستردى تاڭداي الماسا، ۋاقىتشا ۇكىمەت باسشىسى وكىلدەر پالاتاسىنىڭ تاراتىلعانىن جاريالاي الادى. مۇنداي جاعدايدا سايلاۋ كوميسسياسى بەس كۇن ىشىندە پارلامەنتتىك سايلاۋدىڭ وتەتىن كۇنىن جاريالاۋى ءتيىس. الايدا، جەرگىلىكتى ساراپشىلار مۇنداي ناتيجە بولۋى ەكىتالاي دەپ ەسەپتەيدى.
سەتتحا تحاۆيسيننىڭ كانديداتۋراسىن كورولدىك پارلامەنت 2023-جىلدىڭ 22-تامىزىندا ماقۇلدانعان.
ايتا كەتەيىك، ناۋرىز ايىندا تايلاند پارلامەنتى ءبىر جىنىستى نەكە تۋرالى زاڭ قابىلدادى.
