تايلاند پەن كامبودجا اراسىندا قاقتىعىس باستالدى: «جەر ءۇشىن سوعىس» وپەراتسياسى

استانا. قازاقپارات - 2025-جىلدىڭ 24-شىلدەسىندە تايلاند پەن كامبودجا اراسىنداعى شەكارادا اسكەري قاقتىعىستار باستالىپ، جاعداي كۇرت ۋشىعىپ كەتتى، دەپ حابارلايدى El.kz ينتەرنەت پورتالى.

تاڭعى ساعات 07:30 شاماسىندا (بانگكوك ۋاقىتىمەن) پرەاحۆيحەار جانە وددار-ميەنچەي پروۆينتسيالارى ماڭىنداعى داۋلى ايماقتا قارۋلى اتىستار تىركەلدى. جەرگىلىكتى تۇرعىنداردىڭ ايتۋىنشا، ەكى جاق تا اۋىر قارۋ-جاراق قولدانعان، جارىلىستار مەن اتىس ءۇنى بىرنەشە ساعاتقا سوزىلعان.

اۋە شابۋىلدارى مەن اسكەري ارەكەتتەر

تايلاندتىڭ اسكەري-اۋە كۇشتەرى قاقتىعىس بارىسىندا العاش رەت تىكەلەي ارالاسىپ، ساعات 11:30 دا (بانگكوك ۋاقىتىمەن) F-16 جويعىش ۇشاقتارىمەن كامبودجا اۋماعىنداعى اسكەري پوزيتسيالارعا سوققى جاساعان. بۇل - وسى جانجال بارىسىندا اۋە كۇشتەرىنىڭ العاش رەت قولدانىلۋى.

بۇعان جاۋاپ رەتىندە كامبودجا تارابى ءوز اۋماعىنداعى قاۋىپسىزدىكتىڭ بۇزىلعانىن ايتىپ، ارەكەتتى «ارانداتۋسىز باستالعان باسقىنشىلىق» دەپ باعالادى. ەلدىڭ قورعانىس مينيسترلىگىنىڭ وكىلى گەنەرال-لەيتەنانت مالي سوچحەات كامبودجا قارۋلى كۇشتەرى تەك ءوزىن-ءوزى قورعاۋ ماقساتىندا ارەكەت ەتۋدە دەپ مالىمدەدى.

تايلاندتىڭ رەسمي مالىمدەمەسى جانە «جەر ءۇشىن سوعىس» وپەراتسياسى

قاقتىعىستىڭ اياسىندا تايلاند بيلىگى «جەر ءۇشىن سوعىس» اتتى ارنايى اسكەري وپەراتسيانى ىسكە قوستى. وپەراتسيانى باسقارۋ گەنەرال پانا كلەۋپلودحۋككە تاپسىرىلدى.

تاي بيلىگىنىڭ تۇسىندىرۋىنشە، وپەراتسيانىڭ باستى ماقساتى - «تاي جەرىن اياققا تاپتاعانداردى كۇيرەتۋ. بۇل - جەر ءۇشىن، حالىق ءۇشىن، تايلاندتىڭ ابىرويى ءۇشىن سوعىس».

جانجالدىڭ گەوگرافيالىق نەگىزى

تايلاند پەن كامبودجا اراسىندا داۋ ۋبونراتچاتحاني (تايلاند) جانە پرەاحۆيحەار (كامبودجا) پروۆينتسيالارىنىڭ اراسىنداعى شەكارالىق اۋماققا قاتىستى. بۇل ايماقتا 28-مامىر 2025-جىلى دا قىسقا مەرزىمدى قاقتىعىس تىركەلگەن بولاتىن. قازىرگى جاعداي - سول شيەلەنىستىڭ جالعاسى ءارى اۋقىمى كەڭەيگەن كەزەڭى.

ادام شىعىنى مەن زارداپ شەككەندەر

بۇگىنگى تاڭدا ەكى تاراپتان دا ادام شىعىنى جايلى رەسمي مالىمەتتەر جاريالانۋدا. CNN جانە باسقا دا ب ا ق- تاردىڭ حابارلاۋىنشا، كەمىندە 8 ادام (سونىڭ ىشىندە اسكەري قىزمەتكەرلەر مەن بەيبىت تۇرعىندار) قازا تاپقان. سونىمەن قاتار:

تايلاندتىڭ سيساكەت پروۆينتسياسى، كانتحارالاك اۋدانىنداعى دۇكەنگە زىمىران ءتيۋى سالدارىنان بەيبىت تۇرعىندار مەرت بولعان؛

سۋرين پروۆينتسياسىندا زىمىران اۋرۋحانا عيماراتىنا تۇسكەن. بارلىعى بەس اۋرۋحانا ەۆاكۋاتسيالانعان؛

تايلاند دەنساۋلىق ساقتاۋ ءمينيسترى سومساك تحەپسۋتحيننىڭ ايتۋىنشا، كەمىندە 1 اسكەري جانە 11 بەيبىت تۇرعىن كامبودجانىڭ شابۋىلدارى كەزىندە قازا تاپقان؛

قازىرگى ۋاقىتتا تىندا اۋرۋحانالارىندا زارداپ شەككەندەردى قابىلداۋعا دايىندىق ءجۇرىپ جاتىر.

اسكەري تەحنيكانىڭ قولدانىلۋى

اسكەري وپەراتسيا بارىسىندا ەكى جاق تا تانكتەردى كەڭ كولەمدە قولدانىپ، قارسى شابۋىلدار ۇيىمداستىرعان. تاي اسكەرلەرى كەمىندە ەكى كامبودجالىق تانكتى جويعانىن مالىمدەدى. سونىمەن قاتار، ارتيللەريالىق سوققىلار مەن سنارياد تاستاۋ ارەكەتتەرى بەلسەندى تۇردە جۇرگىزىلۋدە.

شەكارا ماڭىندا ەكى تاراپ تا پوزيتسيالارىن نىعايتىپ، جانجالدىڭ توقتار ءتۇرى كورىنبەي وتىر. ازىرگە تاراپتار ءبىر-ءبىرىن قاقتىعىستى ءبىرىنشى بولىپ باستاعانى ءۇشىن ايىپتاۋدا.

ايماقتىق قاۋىپسىزدىك پەن ازاماتتاردىڭ قاۋىپسىزدىگىنە قاۋىپ ءتوندىرىپ تۇرعان بۇل قاقتىعىس حالىقارالىق دەڭگەيدەگى نازاردى تالاپ ەتەدى. جاعدايدىڭ قالاي ءوربيتىنى الداعى كۇندەرى بەلگىلى بولادى.