تايۆاندا «قىتايدىڭ باسىپ كىرۋى» تاقىرىبىنداعى تەلەحيكايا كورسەتىلەدى

استانا. KAZINFORM - قىتايدىڭ تايۆانعا باسىپ كىرۋىن تاقىرىپ ەتكەن «نولدىك كۇن شابۋىلى» (Zero Day Attack) اتتى تەلەحيكايا 2025-جىلدىڭ 2-تامىزىنان باستاپ تايۆاندا LINE TV ،MOD/Hami Video جانە Taiwan Mobile MyVideo سياقتى پلاتفورمالاردا كورسەتىلەدى.

تايۆاننىڭ Zero Day WenChuang كومپانياسى تۇسىرگەن بۇل تەلەحيكايا قىتاي حالىق ازاتتىق ارمياسىنىڭ تايۆانعا قارسى اسكەري وپەراتسيا باستاعانى تۋرالى ويدان شىعارىلعان وقيعانى نەگىزگە الىپ، تايۆان قوعامى سوعىس قاۋپى كەزىندە باستان كەشەتىن كۇيزەلىس پەن وزگەرىستەردى باياندايدى.

حيكايادا 2028-جىلى تايۆانداعى باسشى سايلاۋدان كەيىنگى بيلىك اۋىسۋ كەزەڭىندە، قىتاي حالىق ازاتتىق ارمياسى تايۆاننىڭ وڭتۇستىك-شىعىس تەڭىز ايماعىنداعى Y-8 ۇشاعىنىڭ اپاتقا ۇشىراۋىن سىلتاۋ ەتىپ، تايۆانعا تەڭىز جانە اۋە بلوكاداسىن جاريالاپ، جەتى كۇن ىشىندە «اسكەري بىرىگۋ» ماقساتىمەن ارالعا باسىپ كىرۋدى جوسپارلايدى.

تەلەحيكايا سوعىس باستالعانعا دەيىنگى جانە كەيىنگى تايۆان قوعامىنداعى قارجىلىق داعدارىس، قور بيرجاسىنىڭ قۇلدىراۋى، حالىقارالىق ەۆاكۋاتسيا، قوعامدىق ينفراقۇرىلىمنىڭ توقتاۋى، كيبەرشابۋىلدار مەن جالعان اقپاراتتىڭ تارالۋى سياقتى كۇيزەلىستەردى سۋرەتتەيدى.

سونىمەن قاتار، حيكايادا لاڭكەستىك شابۋىلدار، ب ا ق- قا ەنۋ، جەرگىلىكتى قىلمىستىق توپتاردىڭ ىشكى بۇلىك شىعارۋى، جەرگىلىكتى ءدىني ۇيىمداردىڭ مانيپۋلياتسيالانۋى، جەلىدەگى تانىمال تۇلعالاردىڭ ساتقىندىق جاساعاننان كەيىن جاۋعا اينالۋى، تايۆاندىق كاسىپكەرلەر وتباسىلارىنا بولشەكتەنۋگە قارسى قىسىم جانە باسقا دا كۇردەلى ماسەلەلەر قامتىلادى. بۇل تايۆان قوعامىنىڭ داعدارىس كەزىندەگى ءبولىنۋى مەن ادامزاتتىڭ كۇرەسىن كورسەتەدى.

تەلەحيكايانى تۇسىرۋگە تايۆان بيلىگىنىڭ «قىتاي رەسپۋبليكاسى» ۇكىمەتىنىڭ مادەنيەت مينيسترلىگى قارجىلاي قولداۋ كورسەتكەن (جالپى بيۋدجەتتىڭ شامامەن 27,51 پايىزى)، سونىمەن قاتار ءتۇسىرىلىم كەزىندە تايۆان قارۋلى كۇشتەرى دە كومەك بەرگەن. جوبانىڭ جالپى بيۋجەتى 7,2 ميلليون ا ق ش دوللارىن قۇرايدى.

پروديۋسەرلەردىڭ ايتۋىنشا، تەلەحيكايانىڭ يدەياسى 2022-جىلى رەسەي مەن ۋكراينا اراسىنداعى قارۋلى قاقتىعىس جانە سول جىلى قىتاي حالىق ازاتتىق ارمياسىنىڭ شىعىس اسكەري وكرۋگىنىڭ تايۆان ماڭىنداعى اسكەري جاتتىعۋلارىنان شابىت العان.

تايۆان مەن قىتاي اراسىنداعى ءبولىنۋ تاريحى

ەكىنشى دۇنيەجۇزىلىك سوعىستان كەيىن قىتايدا ازاماتتىق سوعىس ءورشىپ، جەڭىلىسكە ۇشىراعان گوميندان ۇكىمەتى تايۆان ارالىنا شەگىنىپ، «قىتاي رەسپۋبليكاسىن» قۇردى.

ال جەڭىسكە جەتكەن قىتاي كوممۋنيستىك پارتياسى قىتاي حالىق رەسپۋبليكاسىن (ق ح ر) جاريالادى. وسى كەزدەن باستاپ ەكى تاراپ اراسىندا ساياسي قاراما-قايشىلىق ورنادى.

قىتاي حالىق رەسپۋبليكاسى «ءبىر قىتاي» قاعيداسىن ۇستانىپ، تايۆاندى قىتاي اۋماعىنىڭ اجىراماس بولىگى دەپ سانايدى جانە بەيبىت بىرىگۋگە ۇمتىلادى. 2005-جىلى بەيجىڭ «بولشەكتەنۋگە قارسى مەملەكەتتىك زاڭ» قابىلداپ، ەگەر تايۆان «تاۋەلسىزدىك» جاريالاسا نەمەسە بىرىگۋگە كەدەرگى كەلتىرەتىن جاعدايلار تۋىنداسا، بەيبىت ەمەس شارالار قولداناتىنىن مالىمدەدى.

تايۆان ىشىندە ءارتۇرلى ۇستانىمدار بار: بيلىكتەگى دەموكراتيالىق پروگرەسسيۆتى پارتيا (DPP) تايۆاننىڭ دەموكراتيالىق اۆتونومياسىن باسا ايتىپ، بەيجىڭنىڭ ەگەمەندىك تالاپتارىنا قارسى شىعادى. ال گوميندان پارتياسى (KMT) ق ح ر مەن ەكونوميكالىق جانە مادەني بايلانىستاردى نىعايتۋدى، بەيبىت كەلىسسوزدەردى قولدايدى.

تايۆانداعى قازىرگى جاعداي

قازىرگى ۋاقىتتا ەكى جاقتىڭ قارىم-قاتىناسى شيەلەنىستى كۇيدە. ق ح ر تاراپى اسكەري جانە ەكونوميكالىق قىسىمدى كۇشەيتىپ، جيى اسكەري جاتتىعۋلار وتكىزۋدە، بۇل تايۆانعا «اسكەري ەسكەرتۋ» رەتىندە باعالانادى.

ال تايۆان بولسا، ا ق ش، جاپونيا سياقتى ەلدەرمەن اسكەري ىنتىماقتاستىقتى كۇشەيتىپ، قورعانىس قابىلەتىن ارتتىرۋدا، سونىمەن قاتار مادەنيەت پەن ب ا ق ارقىلى «تايۆان تاريحىن» ناسيحاتتاۋدا.