تاياۋ شىعىستاعى احۋال: وتاندىق اۋە كومپانيالار رەيستەردى توقتاتۋعا ءماجبۇر بولدى
استانا. KAZINFORM - كولىك مينيسترلىگى تاياۋ شىعىستاعى جاعدايدىڭ شيەلەنىسۋىنە سايكەس قازاقستاندىق اۋە كومپانيالارىنىڭ رەيستەردى ۋاقىتشا توقتاتۋى تۋرالى جاڭارتىلعان اقپارات تاراتتى.
مينيسترلىك مالىمەتىنشە، 2025 -جىلعى 24 - ماۋسىم كۇنگى جاعداي بويىنشا تاياۋ شىعىستاعى اسكەري- ساياسي احۋالدىڭ كۇرت شيەلەنىسۋىنە بايلانىستى ءبىرقاتار ەلدە رەسمي تۇردە شەكتەۋلەر ەنگىزىلىپ، ازاماتتىق اۆياتسياعا ارنالعان اۋە كەڭىستىكتەرى جابىلدى.
- ءماجبۇرلى شارالار قارۋدى قولدانۋ قاۋپى، ناۆيگاتسيالىق جۇيەلەردىڭ دۇرىس جۇمىس ىستەمەۋى، اۋە قورعانىسى جۇيەلەرىنىڭ بەلسەندىلىگى جانە ازاماتتىق اۋە كەمەلەرىنىڭ ۇشۋى ءۇشىن جوعارى تاۋەكەلدەرگە بايلانىستى قابىلداندى، - دەلىنگەن حابارلامادا.
سوڭعى مالىمەتكە سايكەس، شەكتەۋلەر كەلەسى ەلدەردە قولدانىلادى:
يزرايل اۋە كەڭىستىگى تولىق جابىق؛
يران اۋە كەڭىستىگى تولىق جابىق (ونىڭ ىشىندە پارسى جانە ومان شىعاناقتارى)؛
يراك، يوردانيا، ليۆان - زىمىران مەن درون شابۋىل قاۋپىنە سايكەس ۇشۋلاردى ۋاقىتشا شەكتەۋ؛
كۋۆەيت، باحرەين، ب ا ءا - رەيستەردى شەكتەۋ جانە توقتاتۋ، ءىشىنارا قاقتىعىس ايماعىنا جاقىن مارشرۋتتاردى بۇعاتتاۋ.
ءىرى حالىقارالىق اۋەتاسىمالداۋشىلار دا رەيستەردى ۋاقىتشا توقتاتتى. ولاردىڭ قاتارىندا Air France-KLM، United, American Airlines, Japan Airlines, Air Canada دۋباي، دوحا جانە ەر- ريادقا ۇشۋدى توقتاتتى. Qatar Airways ۇشۋ كەستەسىن رەتتەيدى. Etihad رەسمي ەسكەرتۋ جاسادى. Emirates قاقتىعىس ايماعىن اينالىپ، ۇشۋدى جالعاستىرىپ جاتىر. ۆەدومستۆو اتاپ وتكەندەي، وسىعان بايلانىستى قازاقستاندىق اۋە كومپانيالارى قاۋىپسىزدىكتى قامتاماسىز ەتۋ ماقساتىندا دۋباي مەن دوحا قالالارىنا ءبىرقاتار رەيستى ۋاقىتشا توقتاتتى. دەمەك، ەلىمىزدەن شەتەلگە شىقپاقشى ادام سانى - 683 بولسا، شەتەلدەن ەلگە ورالاتىن ادام سانى - 1051 ادام. جالپى العاندا بۇل جاعداي 1734 جولاۋشىعا اسەر ەتتى.
- قازاقستاندىق اۋە كومپانيالاردىڭ پارسى شىعاناعى ەلدەرىنە ۇشۋعا باعىتتالعان رەيستەردى توقتاتا تۇرۋى ايماقتاعى اسكەري-ساياسي جاعدايدىڭ كۇرت شيەلەنىسۋىنە نەگىزدەلگەن ءماجبۇرلى شارا. اۋە كومپانيالارى قابىلداعان شەشىم حالىقارالىق تاجىريبەگە سايكەس قابىلداندى. باستى ماقسات - جولاۋشىلار مەن ەكيپاج مۇشەلەرىنىڭ قاۋىپسىزدىگىن قامتاماسىز ەتۋ. قولدانىستاعى زاڭناماعا سايكەس جولاۋشىلار ىستىق تاماقپەن، قوناق ءۇي جانە ترانسفەرمەن قامتاماسىز ەتىلدى. توقتاتىلعان نەمەسە كەيىنگە شەگەرىلگەن رەيستەر بويىنشا جولاۋشىلار تەگىن قايتا برون قويا الادى نەمەسە اۋە بيلەتتەرىنىڭ قۇنىن تولىق قايتارىپ الا الادى. كولىك مينيسترلىگى اۆياكومپانيالارمەن بىرلەسىپ جاعدايدى ءجىتى باقىلاۋدا، قاجەت بولعان جاعدايدا جەدەل شەشىم قابىلداپ، كەستەنى قايتا قاراۋ جۇمىسى جۇرگىزىلەدى، - دەلىنگەن مينيسترلىك حابارلاماسىندا.
رەيستەر جاقىن ارادا قايتا جۇزەگە اسىرالا باستايدى دەپ كۇتىلىپ وتىر. قوسىمشا اقپارات الۋ ءۇشىن كەلەسى نومىرلەرگە حابارلاسۋ قاجەت:
Air Astana
help.airastana.com
77272444477
(24/7)77172584477+
(24/7) 77027024477+
(24/7) 77272444478+
(24/7) WhatsApp: +77027020074 (24/7)
Online chat: airastana.com
(24/7) SCAT +77252998880
77017382576+
قازاقستاننىڭ اۆياتسيالىق اكىمشىلىگى 7717279825+.
