تاياۋ شىعىس ستۋدەنتتەرى وقۋلارىن قازاقستاندا جالعاستىرۋعا قىزىعۋشىلىق تانىتۋدا

استانا. KAZINFORM - تاياۋ شىعىستاعى جوعارى وقۋ ورىندارىندا ءبىلىم الىپ جاتقان ستۋدەنتتەر وقۋلارىن قازاقستاندا جالعاستىرۋعا قىزىعۋشىلىق تانىتۋدا. ولاردىڭ ىشىندە شەتەلدىكتەر دە بار.

بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ءمالىم ەتتى.

ونىڭ دەرەگىنشە، بۇگىندە 2,5 مىڭنان استام قازاقستاندىق ستۋدەنت تاياۋ شىعىس ەلدەرىنىڭ جوعارى وقۋ ورىندارىندا ءبىلىم الىپ جاتىر. ولاردىڭ باسىم بولىگى، ناقتى ايتقاندا 1722 ءسى بىرىككەن اراب امىرلىكتەرىندە وقيدى. قازىرگى ۋاقىتتا وڭىردەگى احۋالعا بايلانىستى كوپتەگەن ۋنيۆەرسيتەت وقۋ پروتسەسىن ونلاين فورماتقا كوشىرگەن.

- ءبىر جاعىنان بۇل ءبىز ءۇشىن وتە جاقسى مۇمكىندىك. قازىرگى ۋاقىتتا بىزگە ستۋدەنتتەردىڭ اۋىسۋىنا قاتىستى وتىنىمدەر كوپتەپ ءتۇسىپ جاتىر، ءتىپتى شەتەلدىكتەر دە بار. ءبىز وتىنىمدەردى قارايمىز. قالاي اۋىسۋعا بولاتىنىنا، قايدا اۋىسۋىنا بولاتىنان قاتىستى 500 دەن استام اقپاراتتىق سۇرانىس ءتۇستى. بارىنشا ناقتى اقپاراتتى مامىردا بەرە الامىز، - دەدى ساياسات نۇربەك ۇكىمەت وتىرىسىنان كەيىنگى بريفينگتە.

ءمينيستردىڭ مالىمەتىنشە، «بولاشاق» باعدارلاماسى ارقىلى تاياۋ شىعىس ەلدەرىندە ءبىلىم الىپ جاتقان ستۋدەنت جوق.

بۇعان دەيىن ا ق ش- تىڭ تانىمال ۋنيۆەرسيتەتتەرى «بولاشاق» تىزىمىنەن نەلىكتەن الىنعانىن جازعان ەدىك.