تاياۋ شىعىس: «اش-شيفا» اۋرۋحاناسىنان 31 نارەستە ەۆاكۋاتسيالاندى
دۇنيەجۇزىلىك دەنساۋلىق ساقتاۋ ۇيىمىنىڭ وكىلدەرى باستاعان ب ۇ ۇ-نىڭ گۋمانيتارلىق جاعدايدى باعالاۋ جونىندەگى بىرلەسكەن توبى گازانىڭ سولتۇستىگىندەگى «اش-شيفا» اۋرۋحاناسىنا باردى، دەپ حابارلايدى قازاقپارات BBC اگەنتتىگىنە سىلتەمە جاساپ.
بۇدان سوڭ پالەستينالىق قىزىل جارتى اي ۇيىمىنىڭ جەدەل جاردەم بريگاداسى ب ۇ ۇ مەن د د س ۇ ۇيلەستىرۋمەن گازاداعى «اش-شيفا» اۋرۋحاناسىنان شالا تۋعان 31 نارەستەنى ەۆاكۋاتسيالادى.
قاۋىپسىزدىككە بايلانىستى بەرىلگەن شەكتەۋلى ۋاقىتتا كوماندا اۋرۋحانا ىشىندە 1 ساعات ۋاقىت قانا بولا الدى. كوماندا مۇشەلەرى بۇل ۋاقىتتى «اجال اۋماعى» ال ونداعى جاعدايدى «جانتالاس» دەپ اتادى.
مالىمدەمەدە توپ وكىلدەرى اۋرۋحانانىڭ اتقىلانعانىن، كىرىبەرىستەگى 80 نەن استام ادام جەرلەنگەن مولانى كورگەنىن جەتكىزگەن.
كەيىنگى 6 اپتادا تازا سۋ، وتىن، ءدارى-دارمەكتەر مەن ازىق-تۇلىك سياقتى وزگە دە ءبىرىنشى كەزەكتە كەرەك زاتتاردىڭ جەتىسپەۋى سالدارىنان، كەزىندە گازا سەكتورىنداعى ەڭ ءىرى، ەڭ زاماناۋي، ەڭ جاقسى جابدىقتالعان «اش-شيفا» اۋرۋحاناسى مەديتسينالىق مەكەمە رەتىندە قىزمەتىن توقتاتتى، دەلىنگەن د د س ۇ مالىمدەمەسىندە.
اۋرۋحاناعا بارعان توپ وكىلدەرى قاۋىپسىزدىكپەن بايلانىستى جاعدايدىڭ سالدارىنان مەديتسينا ماماندارى اۋرۋحاناداعى قالدىقتاردى ءتيىمدى جويا الماعانىن ايتادى. سونىڭ سالدارىنان اۋرۋحانانىڭ ءدالىزى مەن اۋماعى مەديتسينالىق جانە قاتتى قالدىقتارعا سونداي-اق وزگە دە قوقىسقا تولعان. بۇل ءوز كەزەگىندە اۋرۋ جۇقتىرۋ قاۋپىن ارتتىرىپ وتىر.
حالىقارالىق ۇيىمنان كەلگەن توپ وكىلدەرى تىلدەسكەن مەديتسينالىق پەرسونالدار مەن پاتسيەنتتەر ءوز ءومىرى مەن دەنساۋلىعى ءۇشىن قورقاتىنىن ايتىپ، ەۆاكۋاتسيالاۋدى سۇرادى، دەلىنگەن د د س ۇ سايتىنداعى مالىمدەمەدە.
وندا سونىمەن قاتار اۋرۋحانادا 25 مەديتسينا مامانى مەن 291 پاتسيەنت قالعانى ايتىلعان. ەڭ سوراقىسى كەيىنگى 2-3 كۇندە بىرنەشە پاتسيەنت مەديتسينالىق كومەك كورسەتۋ جۇمىستارى توقتاتىلعان سوڭ كوز جۇمعان.
پاتسيەنتتەردىڭ اراسىندا دەنساۋلىق جاعدايى وتە ناشار 32 نارەستە بار، جەلدەتۋ جۇيەسى جوق ينتەنسيۆتى تەراپيا بولىمىندە 2 ادام جاتىر، 22 ادام دياليزدە جاتىر، ولاردىڭ ءومىرى ءۇشىن ماڭىزدى بولىپ تابىلاتىن ەمدەۋگە مۇمكىندىك جوق.
كەيىنىرەك پالەستينانىڭ قىزىل جارتى اي ۇيىمى قوعامى 31 شالا تۋعان نارەستەنىڭ «اش-شيفا» اۋرۋحاناسىنان ءساتتى ەۆاكۋاتسيالانعانىن جەتكىزدى.
