تاسقىننىڭ ەكىنشى تولقىنى: ش ق و اۋماعىنىڭ جارتىسىنا جۋىعىندا ءالى قار جاتىر

استانا. KAZINFORM - شىعىس قازاقستان وبلىسىندا سۋ تاسقىنىنىڭ ەكىنشى تولقىنى باستالدى. بۇل تۋرالى ش ق و ت ج د توتەنشە جاعدايلاردىڭ الدىن الۋ باسقارماسىنىڭ اعا ينجەنەرى اياۋلىم كەكيەۆا ايتتى.

«قازىرگى ۋاقىتتا شىعىس قازاقستان وبلىسىنىڭ ايماقتارىندا جانە تاۋلاردىڭ وڭتۇستىك بەتكەيلەرىندە قار جامىلعىسىنىڭ ەرۋى باستالدى. ياعني، وبلىستا سۋ تاسقىنىنىڭ ەكىنشى تولقىنى باستالدى دەپ بولجانادى. وبلىستىڭ سولتۇستىك، سولتۇستىك-شىعىس جانە شىعىس اۋداندارىندا، اتاپ ايتقاندا، ريددەر قالاسىندا، التاي، سامار، مارقاكول، گلۋبوكوە، كاتونقاراعاي، كۇرشىم، شەمونايحا اۋداندارىندا سۋ تاسقىنى قاۋپى تۋىنداۋى مۇمكىن»، - دەدى ول ورتالىق كوممۋنيكاتسيالار قىزمەتىندەگى بريفينگتە.

ونىڭ دەرەگىنشە، وبلىس اۋماعىنىڭ 44 پايىزى قار جامىلىپ جاتىر. كوپتەگەن اۋدانداردا قار قورى جانە ونداعى سۋدىڭ مولشەرى نورمادان 1,5-2 ەسە جوعارى.

«بارلىق گيدروتەحنيكالىق قۇرىلىستار شتاتتىق رەجيمدە جۇمىس ىستەۋدە. سۋ تاسقىنى جاعدايىن ۋاقىتىلى باعالاۋ ءۇشىن تۇراقتى تۇردە اەروۆيزۋالدىق تەكسەرۋلەر جۇرگىزىلەدى. موبيلدى توپتار كۇن سايىن تاۋلىك بويى مونيتورينگ جۇرگىزەدى. جاعالاۋدى نىعايتۋ جانە وزەندەردىڭ ءتۇبىن تەرەڭدەتۋ، بوگەت سالۋ، قاپشىق توسەۋ جۇمىستارى قولعا الىنعان. جەرگىلىكتى اتقارۋشى ورگاندار ارنالاردى، ارىقتار مەن كوپىرلەردى تازارتۋ بويىنشا جوسپارلانعان جۇمىستى تولىق كولەمدە اياقتادى. وبلىستا جەدەل شتاب جۇمىس ىستەپ تۇر. بارلىق قىزمەتتەردىڭ جۇمىسى ۇيلەستىرىلگەن. كۇش- قۇرالدار ءازىر»، - دەدى اياۋلىم كەكيەۆا.

اۆتور

مارلان جيەمباي