تاسقىننان زارداپ شەككەندەرگە تۇرمىستىق تەحنيكا الاتىن اقشا دا بەرەمىز - ۇكىمەت باسشىسى

استانا. KAZINFORM - پرەمەر-مينيستر ولجاس بەكتەنوۆ ۇكىمەت وتىرىسىندا تاسقىننان زارداپ شەككەن تۇرعىندارعا تۇرمىستىق تەحنيكا الۋعا قاراجات بەرىلەتىنىن ايتتى.

«زارداپ شەككەندەرگە كەلتىرىلگەن شىعىنداردى وتەۋ تارتىبىنە تۇزەتۋلەر بەكىتىلدى. كەشە مەن ءتيىستى قاۋلىعا قول قويدىم. قازىرگى ۋاقىتتا 11 مىڭعا جۋىق وتباسى 100 ايلىق ەسەپتىك كورسەتكىش مولشەرىندە تولەم الدى. بۇل - ۇلكەن جۇمىستىڭ باسى عانا. وعان قوسىمشا تاعى 150-ايلىق ەسەپتىك كورسەتكىشكە دەيىن تولەيتىن بولامىز. وعان ادامدار توڭازىتقىش، ۇستەل، ورىندىقتار، ىدىس- اياق، كيىم- كەشەك سياقتى جوعالعان ءبىرىنشى كەزەكتەگى قاجەتتى زاتتاردى ساتىپ الا الادى»، - دەدى ۇكىمەت باسشىسى.

سونداي-اق، ول كاسىپكەرلەردىڭ شىعىنى وتەلەتىنىن ايتتى.

«ازاماتتارعا ايتاتىنىم، سابىر ساقتاڭىزدار. ەشكىم دە كومەكسىز قالمايدى بۇل ماسەلەلەردىڭ بارلىعى پرەزيدەنتتىڭ جانە مەنىڭ جەكە باقىلاۋىمدا. سوندىقتان ءبىز وسى سىناقتان ابىرويمەن وتەمىز دەپ بىلەمىن»، - دەدى پرەمەر-مينيستر.

اۆتور
ەسىمجان ناقتىباي