تاسقىننان بۇلىنگەن ۇيگە بولىنەتىن 22 ميلليون تەڭگەنى قولعا بەرە مە - مينيستر جاۋاپ بەردى

استانا. KAZINFORM - ونەركاسىپ جانە قۇرىلىس ءمينيسترى قانات شارلاپايەۆ ۇكىمەت وتىرىسىنان كەيىن وتكەن بريفينگىدە تاسقىننان بۇلىنگەن ۇيلەردى قايتا سالۋعا بولىنەتىن قاراجات قالاي يگەرىلەتىنىن ايتتى.

«مەملەكەت ەشكىمنىڭ قولىنا ەشقانداي قاراجات بەرمەيدى. مىسالى، ءار ادام ءارتۇرلى. جاۋاپكەرشىلىگى بار ادام بولادى، جاۋاپكەرشىلىگى جوق ادامدار بولادى. قازىرگى تاڭدا ءۇي سالۋعا، قايتا تۇرعىزۋعا ارنالعان قاراجاتتى قولعا بەرسە، باسقا ماقساتقا جۇمسالىپ كەتۋى مۇمكىن. ودان كەيىن قىستا مۇنداي كىسىلەردى نە ىستەيمىز، تاعى اقشا بەرەمىز بە نەمەسە قايتا ءۇي سالىپ بەرەمىز بە؟ سونىمەن، مەملەكەتتىڭ شەشىمى وسىنداي. تاسقىننان زارداپ شەككەن ءار ادامنىڭ ءوز قالاۋى بار. ءۇيىن قايتا تۇرعىزادى نەمەسە اكىمدىكتەر قايتالاما نارىقتان پاتەر الىپ بەرەدى. وسى ەكى تاڭداۋدىڭ ءبىرىن پايدالانۋعا بولادى»، - دەدى ول.

ونىڭ ايتۋىنشا، جارتىلاي بۇلىنگەن ۇيلەردىڭ جوندەۋگە بولىنەتىن قاراجات تۇرعىنداردىڭ قولىنا بەرىلۋى مۇمكىن.

«جوندەۋ جۇمىستارىن اكىمدىك قۇرىلىس كومپانياسىنا جۇكتەي الادى نەمەسە بىرنەشە وڭىردە اكىمدىك شەشىمىمەن باسپانانى جوندەۋ شىعىندارىن حالىقتىڭ قولىنا بەرەدى. ياعني، ءۇيدى قايتا سالۋ ءۇشىن قولعا قاراجات بەرمەيمىز»، - دەدى قانات شارلاپايەۆ.

اۆتور

ەسىمجان ناقتىباي