تاريحي كەسەنەلەر مەملەكەتتىك مۇلىك رەتىندە تىركەلە مە - ۆيتسە- پرەمەر جاۋابى
استانا. KAZINFORM - ەلىمىزدە 500 گە جۋىق ساۋلەت جانە قالا قۇرىلىسى ەسكەرتكىشتەرى جەكە سۋبەكتىلەردىڭ مەنشىگىندە. بۇل جايىندا ءماجىلىس دەپۋتاتتارىنىڭ ساۋالىنا ۇكىمەت باسشىسىنىڭ ورىنباسارى ەرمەك كوشەربايەۆتىڭ جاۋابىندا ايتىلعان.
- بۇگىنگى كۇنى قىزمەتتەرى تاريحي-مادەني مۇرا وبەكتىلەرىن قورعاۋعا جانە باسقارۋعا باعىتتالعان 32 مەملەكەتتىك ۇيىم جۇمىس ىستەيدى. ەلىمىزدە 25 مىڭنان استام تاريحي- مادەني مۇرا وبەكتىلەرى بار ەكەنىن ەسكەرسەك، بۇل كورسەتكىشتىڭ تومەن ەكەنى راس. «تاريحي- مادەني مۇرا وبەكتىلەرىن قورعاۋ جانە پايدالانۋ تۋرالى» زاڭىنىڭ 14-بابىنا سايكەس قازاقستان رەسپۋبليكاسى، جەكە جانە زاڭدى تۇلعالار تاريحي-مادەني مۇرا وبەكتىلەرىنە مەنشىك قۇقىعى سۋبەكتىلەرى سانالادى. بۇگىنگى كۇنى ەلىمىزدە 500 گە جۋىق ساۋلەت جانە قالا قۇرىلىسى ەسكەرتكىشتەرى جەكە سۋبەكتىلەردىڭ مەنشىگىندە.
ال، تاريحي كەسەنەلەر جايلى ايتار بولساق، ول - قايتىس بولعان ادامداردى جەرلەۋ ورىندارى جانە وسى ورايدا مەملەكەتتىك مۇلىك رەتىندە تىركەلمەيدى، - دەدى ۆيتسە- پرەمەر جاۋابىندا.
ونىڭ اتاپ وتۋىنشە، قازاقستان رەسپۋبليكاسىنىڭ اتىنان حالىقارالىق جانە رەسپۋبليكالىق ماڭىزى بار تاريح جانە مادەنيەت ەسكەرتكىشتەرىنە مەنشىك يەسىنىڭ وكىلەتتىكتەرىن - مادەنيەت جانە اقپارات مينيسترلىگى، ال جەرگىلىكتى ماڭىزى بار تاريح جانە مادەنيەت ەسكەرتكىشتەرىنە جەرگىلىكتى اتقارۋشى ورگاندارى جۇزەگە اسىرادى.
- بايدىبەك اتا، دومالاق انا كەسەنەلەرى، اقمەشىت ۇڭگىرى جەرگىلىكتى ماڭىزى بار تاريح جانە مادەنيەت ەسكەرتكىشتەرىنىڭ تىزىمىندە بولسا، قوس انا كەسەنەسى تاريحي-مادەني مۇرا وبەكتىلەرىنىڭ الدىن الا ەسەپكە الۋ تىزىمىنە ەنگىزىلگەن. الايدا حالىق اراسىنان كەيبىر ادامداردىڭ ولارعا يەلىك ەتۋدە. وسى ورايدا تۇركىستان وبلىسىنىڭ اكىمدىگى دومالاق انا، بايدىبەك اتا كەسەنەلەرى، اقمەشىت ۇڭگىرى بويىنشا ولاردىڭ مەنشىكتىك تيەسىلىگىن اجىراتۋ جۇمىستارىن جۇرگىزۋدە، - دەدى ەرمەك كوشەربايەۆ.
بۇعان دەيىن قوجا احمەت ياساۋي كەسەنەسىندەگى قابىرحانا بولمەسىنىڭ ەسىگى الماتىداعى «قىرىم ارالى» عىلىمي رەستاۆراتسيالىق زەرتحاناسىنىڭ كومەگىمەن قايتا قالپىنا كەلتىرىلگەنىن جازعان ەدىك.
