تاريحي ءسات! ابيبا ءابۋجاقىنوۆا - ازيا ويىندارىنىڭ كۇمىس جۇلدەگەرى
ساناۋلى ساتتەر بۇرىن دزيۋدوشى ابيبا ءابۋجاقىنوۆا (48 ك گ) قىتايدىڭ حاڭجوۋ قالاسىندا ءوتىپ جاتقان ⅩⅨ جازعى ازيا ويىندارىندا كۇمىس جۇلدەگەر اتاندى، دەپ حابارلايدى قازاقپارات سپورتتى دامىتۋ ديرەكسياسىنىڭ باسپا ءسوز قىزمەتىنە سىلتەپ.
ول فينالدا 3 دۇركىن الەم چەمپونى، 2018 -جىلعى دجاكاتاداعى ازيا ويىندارىنىڭ جەڭىمپازى جاپونيالىق ناسۋمو سۋنوداعا ەسە جىبەردى. ءابيبا - ايەلدەر اراسىندا دزيۋدودان سارى قۇرلىق ويىندارىنىڭ فينالىنا شىققان ۆارۆارا ماسياينادان كەيىنگى (1998 -جىلى) ەكىنشى سپورتشى.
ۇلتتىق قۇراما سپورتشىسى حاڭجوۋداعى العاشقى بەلدەسۋىندە فيليپپين سپورتشىسىن ۆازاري ادىسىمەن، سوسىن، سولتۇستىك كورەيا پالۋانىن ۇتتى. ال جارتىلاي فينالدا وڭتۇستىك كورەيالىق لي حەك ەنگ ەسكەرتۋ الىپ، ءابۋجاقىنوۆاعا جول بەردى.
ايتا كەتەيىك، ابيبا ءابۋجاقىنوۆا بيىل اقپاندا پورتۋگاليادا گران-پري باسەكەسىندە توپ جارعان (ايەلدەر اراسىندا) تۇڭعىش قازاق دزيۋدوشىنا اينالعان. سونداي-اق ول - وتگونسەتسەگ گالبادراحتان كەيىن قازاقستاندىق ارۋلار اراسىنان الەم چەمپيوناتىندا مەدال العان سپورتشى.
