تاريفتەردى وزگەرتۋ جالعاسا بەرەدى - ولجاس بەكتەنوۆ

استانا. KAZINFORM – ق ر پرەمەر-ءمينيسترى ولجاس بەكتەنوۆ ۇكىمەتتە وتكەن باسپا ءسوز ءماسليحاتىندا تۇرعىن ءۇي-شارۋاشىلىق سالاسىنداعى تاريفتەردى ءوسىرۋ قاجەتتىگىن ايتتى.

- بۇل - حالىقتى تولعاندىراتىن وتە وزەكتى ماسەلە. تاريفتەردىڭ ءوسۋى ەش توقتاتىلعان جوق. وسى مۇمكىندىكتى پايدالانىپ ايتقىم كەلەدى: الداعى ۋاقىتتا دا تاريفتەر وسە بەرەدى. بۇل - اۋىر ءارى جاعىمسىز تاقىرىپ، ءبىراق ۇكىمەت بۇل تۋرالى اشىق ايتىپ وتىر جانە تاريفتەردى نارىقتىق دەڭگەيگە جەتكىزۋ ساياساتىن جۇرگىزىپ جاتىر، - دەدى ۇكىمەت باسشىسى.

ونىڭ ايتۋىنشا، تاريفتەر ۇزاق ۋاقىت بويى قاتتى رەتتەلىپ، تۇرعىن ءۇي-كوممۋنالدىق شارۋاشىلىققا ينۆەستيتسيا سالۋعا مۇمكىندىك بەرمەگەن جاعداي 2022-2023-جىلدارى ەكىباستۇزدا، ريددەردە بولعان اپاتتارعا اكەپ سوقتى.

- ەگەر قىستا ءۇيىمىز جىلى بولىپ، جارىق، سۋ جانە وزگە دە ينجەنەرلىك جەلىلەر دۇرىس جۇمىس ىستەگەنىن قالاساق، وندا تاريفتەردى كوتەرۋ جولىمەن ءجۇرۋىمىز كەرەك. «تاريفتەر ءوسۋى ۋاقىتشا توقتاتىلدى» دەگەن ءسوز - تەك ينفلياتسياعا تۇسەتىن قىسىمدى ازايتۋ ءۇشىن ولاردىڭ ءوسۋ قارقىنىن قايتا قاراستىردىق دەگەندى بىلدىرەدى. جالپى العاندا، بۇل ساياسات جالعاسا بەرەدى، - دەدى و. بەكتەنوۆ.

ايتا كەتەيىك، بۇگىن ۇكىمەتتە بيىلعى قاڭتار-ماۋسىم ايلارىنداعى الەۋمەتتىك-ەكونوميكالىق دامۋ جانە رەسپۋبليكالىق بيۋدجەتتىڭ اتقارىلۋ قورىتىندىلارى قارالىپ جاتىر. قازاقستان ەكونوميكاسى 6 ايدا 6,2 پايىز ءوسىم كورسەتكەن.