تارازداعى جارىلىستىڭ سەبەبى بەلگىلى بولدى
تاراز. KAZINFORM - كەشە 21:41 كەزىندە جامبىل وبلىسى تاراز قالاسى قاراسۋ شاعىناۋدانى 26- ءۇيدىڭ كىرەبەرىس اسفالتتى جابىنى جارىلىپ، وت لاپ ەتىپ ءوشتى. بۇگىن تاراز قالاسى اكىمدىگى وقيعانىڭ سەبەبىن حابارلادى.

قالالىق گاز شارۋاشىلىعى قىزمەتى گازتالداۋ قۇرىلعىسىمەن زەرتتەپ، ول جەردەن گاز قۇبىرى وتپەيتىنىن جانە گاز جارىلماعانى جونىندە قورىتىندى جاسادى.
وزگە كوممۋنالدىق قىزمەتتەر دە ءوز جەلىلەرىن زەرتتەپ، جاسالعان قورىتىندى ناتيجەسىندە كەشە ساعات 21.44 كەزىندە تاراز قالاسى «سامال» مولتەك اۋدانىندا ورنالاسقان 110/6 ك ۆ- تىق «رىسبەك» پودستانتسياسىنداعى 414 ۇياشىقتان شىعىپ 10-تاراتۋ پۋنكتىنە باراتىن جوعارى كەرنەۋلى جەراستى كابەلى ىستەن شىققانى بەلگىلى بولدى.
اۆاريالىق ءوشۋ كەزىندە ۇياشىق اۆتوماتتى تۇردە ءسونىپ، جەراستى كابەلى ەلەكتر قۋاتىنان اجىراتىلعان.
بۇل 110/6 ك ۆ- تىق ەلەكتر كابەلى وقيعا بولعان جەردەن وتەدى.
ساعات 22.47 دە جارىقسىز قالعان 10 مولتەكاۋداندا رەزەرۆتى جەلىلەرمەن ەلەكتر قۋاتى قالپىنا كەلدى.
اپاتتىق جاعداي بولعان جەراستى كابەلى توقتان اجىراتىلىپ، ءقاۋىپسىز جاعدايعا كەلتىرىلدى. جوندەۋ جۇمىستارى جالعاسىپ جاتىر.
ەسكە سالا كەتەيىك، ءبىز تۇندە تاراز قالاسىندا كۇشتى جارىلىس بولعانىن حابارلاعان ەدىك.