تارازدا ەكى ادامدى قۇلدىقتا ۇستاعان كۇدىكتى ۇستالدى

تاراز قالالىق پوليتسيا باسقارماسىنىڭ 2-پوليتسيا بولىمىنە 24 جانە 40 جاستاعى وزبەكستان رەسپۋبليكاسىنىڭ ازاماتتارىنان ەڭبەكتى پايدالانۋ دەرەگى بويىنشا ارىز تۇسكەن، دەپ حابارلايدى Kazinform.

جامبىل وبلىستىق پوليتسيا دەپارتامەنتى باسپا ءسوز قىزمەتى بەرگەن مالىمەتتەرگە سۇيەنسەك، ارىزدا جابىرلەنۋشىلەر ەر ادام ولاردىڭ جەكە باستى كۋالاندىراتىن قۇجاتتارىن الىپ قويىپ، تاراز قالاسىنداعى قۇرىلىس نىساندارىندا جۇمىس ىستەۋگە ءماجبۇر ەتكەنىن كورسەتكەن. ولار قاشىپ ۇلگەرگەن، الايدا يەلەرى قۇجاتتارىن قايتارۋ ءۇشىن اقشا بوپسالاعان.

اتالعان دەرەك بويىنشا ق ر قىلمىستىق كودەكسىنىڭ 126-بابى 3-بولىگىنىڭ 2-تارماعىمەن، ياعني زاڭسىز باس بوستاندىعىنان ايىرۋ بويىنشا سوتقا دەيىنگى تەرگەپ- تەكسەرۋ امالدارى باستالدى.

جەدەل ىزدەستىرۋ ءىس-شارالارىنىڭ ناتيجەسىندە پوليتسيا قىزمەتكەرلەرى تۇركىستان وبلىسىنىڭ 35 جاستاعى تۇرعىنىن انىقتايدى. ول تالاپ ەتكەن شامامەن 500 مىڭ تەڭگە كولەمىندەگى اقشانىڭ 200 مىڭ تەڭگەسىن العان كەزىندە ۇستالادى.

كۇدىكتى ءوز كىناسىن مويىنداپ، قۇرىقتاۋ بارىسىندا ودان

200 مىڭ تەڭگە اقشالاي قاراجات، «رەدمي-7» ماركالى ۇيالى تەلەفون جانە قۇجاتتار تاركىلەنگەن.

قازىرگى ۋاقىتتا قىلمىستىق ءىس بويىنشا تەرگەۋ ارەكەتتەرى جالعاسىپ جاتىر.

اۆتور

ەلۆيرا جارىلقاسىنوۆا