تارازدا 10 جاسار بالا اۋىر قىلمىستى اشۋعا كومەكتەستى
تاراز. KAZINFORM - ەكى كەشتىڭ ورتاسىندا تاراز قالالىق پوليتسيا باسقارماسىنىڭ كەزەكشى بولىمىنە قوڭىراۋ شالعان ايەل ءۇيىنىڭ جانىندا بەلگىسىز ادام كۇيەۋىنە پىشاق جاراقاتىن سالعانىن حابارلادى.
جەدەل ارەكەت ەتۋدىڭ ارقاسىندا جارالانعان ەر ادام قالالىق اۋرۋحانانىڭ جانساقتاۋ بولىمىنە جەتكىزىلدى. ارتىنشا دەنساۋلىققا قاساقانا اۋىر زيان كەلتىرۋ بابىمەن سوتقا دەيىنگى تەرگەۋ باستالدى.
وقيعا ورنىنا جەدەل جەتكەن پوليتسيا قىزمەتكەرلەرى قىلمىستىڭ ءمان-جايىن انىقتاۋ بارىسىندا جاقىن جەردە ويناپ جۇرگەن 10 جاسار بالا قىلمىستىڭ كەزدەيسوق كۋاگەرى بولعانىن بىلگەن. ءبىر قۋانىشتىسى، ويىن بالاسى بولسا دا ول ءبارىن ەسىنە ساقتاپ قالعان ەكەن. وسىلايشا 10 جاسار بالا پوليتسەيلەرگە كۇدىكتىنىڭ كيىمى، كەلبەتى، قايدا قاشقانى تۋرالى ماڭىزدى اقپاراتتى ايتقان. وقۋشىنىڭ قىراعىلىعىنىڭ ارقاسىندا پوليتسيا قىزمەتكەرلەرى كۇدىكتىنى ءىزىن سۋىتپاي ۇستادى.
پوليتسيا قىزمەتكەرلەرىنە اۋىر قىلمىستى اشۋعا كومەكتەسكەن 10 جاسار بالانىڭ بۇل ەرلىگى ەلەۋسىز قالمادى. تاراز قالاسى پوليتسيا باسقارماسىنىڭ باسشىلىعىمەن وقۋشىعا اۋىر قىلمىستى اشۋعا كومەكتەسكەنى ءۇشىن العىس حات تابىس ەتىلدى.
اۆتور
ورالحان ءداۋىت
