تانىمال قازاقستاندىق اكتەر، ءانشى ۇشاقتا بورتسەرىكتى ۇرىپ تاستاعان

تانىمال مەديا تۇلعا، ءانشى جانە اكتەر FlyArystan اۋەكومپانياسىنىڭ بورتىندا ءتارتىپ بۇزعان. ول كومپانيا بورتسەرىگىنە قاتىستى فيزيكالىق كۇش قولدانىپ، اگرەسسيا تانىتقان.

كومپانيا وكىلدەرى تانىمال قازاقستاندىقتىڭ اتى-ءجونىن اتامادى، - دەپ حابارلايدى ماسسەگەت ءتىلشىسى.

وقيعا 18- جەلتوقساندا بولعان. FlyArystan جولاۋشىسى، تانىمال مەديا تۇلعا، ءانشى جانە اكتەر اۋەكومپانيانىڭ بورتسەرىگىنە قاتىستى فيزيكالىق كۇش قولدانۋ ارقىلى اگرەسسيا تانىتقان.

جولاۋشى ءوزىنىڭ سىرت كيىمىنىڭ باگاج سورەلەرىندە مىجىلىپ قالعانىنا نارازىلىعىن ءبىلدىردى. سودان كەيىن بورتسەرىك جولاۋشىنىڭ سىرت كيىمىن قولجۇكتىڭ ۇستىنە قويۋعا كومەكتەسۋ ءۇشىن قولجۇك سورەسىنەن شىعاردى، الايدا جولاۋشى كۇرتەشەسىن تارتىپ الىپ، بورتسەرىكتى ماڭدايىنان ۇردى. سالدارىنان قىزمەتكەر فيزيكالىق سوققىعا جىعىلىپ، پسيحو-ەموتسيونالدى اۋىر كۇي كەشتى، سونداي-اق رەيس 1 ساعاتقا كەشىگىپ ۇشتى.

دەسترۋكتيۆتى جولاۋشى پوليتسيا قىزمەتكەرلەرىنە تاپسىرىلدى جانە 440-باپ بويىنشا جاۋاپكەرشىلىككە تارتىلدى. بورتسەرىك جولاۋشىنى جاۋاپقا تارتۋ ماقساتىندا جانە زاڭدى تەرگەۋ جۇرگىزۋ ءۇشىن سوت-مەديتسينالىق ساراپتامادان ءوتتى. اۋەكومپانيا ءوز قىزمەتكەرىنە بارىنشا پسيحولوگيالىق، مەديتسينالىق جانە زاڭگەرلىك قولداۋ كورسەتەدى، سونداي-اق ءتارتىپ بۇزعان جولاۋشىنى قارا تىزىمگە ەنگىزۋ بويىنشا جۇمىس جۇرگىزەدى.

ايتا كەتەيىك، اۋەجايدا ءتارتىپ بۇزعان جاعدايدا:

ەگەر جولاۋشى اكىمشىلىك نەمەسە قىلمىستىق جاۋاپكەرشىلىككە تارتىلاتىن قۇقىق بۇزۋشىلىق ىستەسە، اۋەكومپانيا قىزمەتكەرلەرى قاجەتتى قۇجاتتاردى تولتىرادى جانە جولاۋشىنى اۋەجايداعى پوليتسيانىڭ جەلىلىك بولىمىنە تاپسىرادى.

مىسالى، كەيبىر جولاۋشىلار ءازىل تۇرىندە ولاردا جارىلعىش، گراناتا جانە باسقا دا قوعامعا قاۋىپتى زاتتار بار ەكەنىن حابارلايدى. مۇنداي مالىمدەمەلەردىڭ سالدارى جولاۋشىلاردى ەۆاكۋاتسيالاۋعا، رەيستەردىڭ كەشىگۋىنە، ارنايى قىزمەتتەردى نەگىزسىز پايدالانۋعا جانە ت. ب. اكەلەدى.

مۇنداي مالىمدەمەلەر ءۇشىن ق ر ق ك- ءنىڭ 273-بابى بويىنشا 5 جىل باس بوستاندىعىنان ايىرۋ تۇرىندەگى ەڭ جوعارى جازامەن قىلمىستىق جاۋاپكەرشىلىك قاراستىرىلعان.

بورتتا ءتارتىپ بۇزعان جاعدايدا:

ەگەر جولاۋشى اكىمشىلىك نەمەسە قىلمىستىق جاۋاپكەرشىلىككە تارتىلاتىن قۇقىق بۇزۋشىلىق ىستەسە، ەكيپاج قاجەتتى قۇجاتتاردى تولتىرىپ جانە جولاۋشىنى اۋەجايداعى پوليتسيانىڭ جەلىلىك بولىمىنە جەتكىزەدى. ەگەر جولاۋشى ۇشۋ قاۋىپسىزدىگىنە قاۋىپ ءتوندىرۋىن جالعاستىرا بەرسە، كوماندير ءماجبۇرلى قونۋعا شەشىم قابىلداۋى مۇمكىن.