تانىمال فۋتبولشى ديوگۋ جوتا قايتىس بولدى

استانا. KAZINFORM - پورتۋگاليا قۇراماسى مەن اعىلشىندىق «ليۆەرپۋل» كومانداسىنىڭ ويىنشىسى ديوگۋ جوتا جول اپاتىنان قازا تاپتى. بۇل تۋرالى Marca ينتەرنەت باسىلىمى حابارلادى.

Championat.com سپورت پورتالىنىڭ مالىمەتىنشە، جول- كولىك وقيعاسى يسپانيانىڭ باتىسىنداعى سامورا پروۆينتسياسىندا بولعان. قاتتى جىلدامدىقپەن كولىك جولدان شىعىپ كەتكەن، ارتىنشا اۋدارىلعان، ورتەنگەن. سول كەزدە جول اپاتىنا تۇسكەن اعايىندى فۋتبولشىلار كولىكتەن شىعا الماي قالعان. وكىنىشكە قاراي 28 جاستاعى فۋتبولشى مەن ونىڭ اعاسى كوز جۇمدى.

دجوتا - «ليۆەرپۋل» ويىنشىسى رەتىندە كوپشىلىككە تانىمال. اتالعان كلۋب ساپىندا 2020 -جىلدان بەرى وينادى. پورتۋگاليالىق ۆينگەر مەرسيسايدتىق كلۋبپەن بىرگە انگليا چەمپيونى اتاندى، انگليا كۋبوگىن جانە انگليا ليگاسىنىڭ كۋبوگىن جەڭىپ الدى. بۇعان دەيىن ول «ۆۋلۆەرحەمپتون»، «اتلەتيكو مادريد»، «پورتۋ» جانە «پاكوس دە فەررەيرا» كلۋبتارىنىڭ قاتارىندا دا دوپ تەپكەن.

ۇلتتىق قۇراما ساپىندا دا ءساتتى ونەر كورسەتىپ، ەكى رەت UEFA ۇلتتار ليگاسىن جەڭىپ العان بولاتىن.