تانىمال فرانسيالىق سۋرەتشى استاناعا مۋرال سالۋعا كەلەدى
استانا. KAZINFORM - ەلوردادا بيىل شىلدە ايىندا تانىمال فرانسيالىق سۋرەتشى سپورت تاقىرىبىندا مۋرال سالادى. بۇل تۋرالى فرانسيانىڭ قازاقستانداعى توتەنشە جانە وكىلەتتى ەلشىسى ديدە كانەسس ايتتى.
بۇدان بولەك، فرانسيانىڭ قازاقستانداعى ەلشىلىگى بوچچە جانە فۋتبولدان سپورتتىق جارىس، فوتوسۋرەت كورمەسىن ۇيىمداستىرۋدى جوسپارلاپ وتىر.
- كەلەسى اپتادا استاناداعى پاراليمپيادالىق وقۋ ورتالىعىندا ينكليۋزيا جانە پاراليمپيادالىق سپورتتى قولداۋ ماقساتىندا بوچچە جانە فۋتبولدان شاعىن جارىس وتكىزەمىز، - دەدى ديدە كانەسس سپورت جانە تۋريزم ءمينيسترى ەرمەك مارجىقپايەۆپەن كەزدەسۋىندە.
ول استانا اكىمدىگى مۋرال سالۋعا رۇقسات بەرگەنىن ايتتى. مۋرال قازاقستان مەن فرانسيا اراسىنداعى دوستىقتىڭ سيمۆولىنا اينالادى دەپ كۇتىلىپ وتىر.
قابىرعا سۋرەتىنىڭ اشىلۋى 8- شىلدەگە جوسپارلانعان. ال، استاناداعى «اتىراۋ» كوپىرىندە تانىمال سۋرەتشىنىڭ قازاقستاندىق جانە فرانسيالىق سپورتشىلاردى بەينەلەگەن سۋرەت كورمەسى ۇيىمداستىرىلادى.
