تالعارداعى قاندى وقيعا: پوليتسەيلەردىڭ ارەكەتسىزدىگىنە قاتىستى ءىسى قانداي ساتىدا

قونايەۆ. KAZINFORM - تالعار اۋدانى پوليتسيا باسقارماسىنىڭ لاۋازىمدى تۇلعالارىنا قاتىستى تەرگەۋ ءالى دە ءجۇرىپ جاتىر.

الماتى وبلىسىنىڭ پروكۋراتۋراسى تالعار اۋداندىق پوليتسيا باسقارماسى قىزمەتكەرلەرىنە قاتىستى قىلمىستىق كودەكستىڭ 370-بابىنىڭ 4-بولىگى («لاۋازىمدى تۇلعالاردىڭ ارەكەتسىزدىگى») بويىنشا قىلمىستىق ءىس قوزعادى.

ولارعا كامەلەتكە تولماعان قىزدى ۇرلاپ اكەتىپ، ەر ادامدى ولتىرگەن كۇدىكتىنى ۋاقتىلى ۇستاۋ ءۇشىن شارالاردى قابىلداماعان دەگەن ايىپ تاعىلىپ وتىر. قايعىلى وقيعا تالعار اۋدانى قىزىلقايرات اۋىلىندا بولعان ەدى.

Kazinform اگەنتتىگى تەرگەۋدىڭ قانداي ساتىدا ەكەنىن ءبىلۋ ءۇشىن رەسمي ساۋال جولدادى. وبلىس پروكۋرورىنىڭ ورىنباسارى نۇرجان سەرىك ۇلىنىڭ جاۋابىنا سايكەس، تەرگەۋدى قازىرگى ۋاقىتتا الماتى وبلىسى پروكۋراتۋراسىنىڭ سوتقا دەيىنگى تەرگەۋ باسقارماسىنىڭ ۆەدومستۆوارالىق جەدەل-تەرگەۋ توبى جۇرگىزىپ جاتىر.

- قازىرگى تاڭدا ءىس بويىنشا قاجەتتى تەرگەۋ امالدارى مەن ساراپتامالىق زەرتتەۋلەردىڭ كەشەنى جۇرگىزىلىپ جاتىر. ءىستىڭ بارلىق ءمان- جايلارى جان-جاقتى، تولىق ءارى وبەكتيۆتى تۇردە انىقتالۋى قامتاماسىز ەتىلىپ جاتىر، - دەدى ول.

قىلمىستىق كودەكستىڭ اتالعان بابى بويىنشا 7 جىلعا دەيىن بوستاندىعىن شەكتەۋ نەمەسە باس بوستاندىعىنان ايىرۋ تۇرىندەگى جازا، سونداي-اق مۇلىكتى تاركىلەۋ جانە ءومىر بويىنا بەلگىلى ءبىر لاۋازىمداردى اتقارۋ نە بەلگىلى ءبىر قىزمەتپەن اينالىسۋ قۇقىعىنان ايىرۋ جازاسى كوزدەلگەن.

سونىمەن قاتار پروكۋراتۋرا قازاقستان رەسپۋبليكاسى كونستيتۋتسياسىنىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابىنىڭ 1-بولىگىنە سايكەس، ءار ادام سوت ۇكىمى زاڭدى كۇشىنە ەنگەنگە دەيىن كىناسىز بولىپ ەسەپتەلەتىنىن ەسكە سالدى.

ەسكە سالايىق، تالعاردا 2025-جىلعى 6-قىركۇيەكتە جانتۇرشىگەرلىك قىلمىس بولدى: بەيتانىس ادام ەر كىسىنى اتىپ، كىشكەنتاي قىزدى الىپ قاشىپ كەتكەن ەدى.

تەرگەۋ مالىمەتىنشە، كۇدىكتى مەن كىشكەنتاي قىزدىڭ اناسى بۇرىن جاقىن قارىم-قاتىناستا بولعان. ارالارىندا جانجال شىعىپ، ەر ادام ايەلدىڭ اعاسىن مىلتىقپەن اتىپ تاستاعان. ول العان جاراقاتىنان سول جەردە كوز جۇمعان.

كەيىن پوليتسيانىڭ ارنايى جاساعى قىزدى بوساتىپ، كۇدىكتىنى ۇستادى.

ال تالعارداعى وقيعا كەزىندە جاراقات العان كىشكەنتاي قىزعا وتا جاسالدى.

وتكەن اپتادا قىزىلقايرات اۋىلىندا بولعان ەر ادامدى ءولتىرۋ جانە كامەلەتكە تولماعان قىزدى ۇرلاۋ ءىسى بويىنشا سوتقا دەيىنگى تەرگەۋ اياقتالدى.