تالعارداعى جاپپاي توبەلەستە كۇدىكتىلەر قانداي سۋىق قارۋ قولدانعان؟

استانا. قازاقپارات - الماتى وبلىستىق پوليتسيا دەپارتامەنتى باستىعىنىڭ مىندەتىن اتقارۋشى سەرىك شالقاروۆ تالعارداعى جاپپاي توبەلەسكە قاتىستى سۇراقتارعا جاۋاپ بەردى.

شالقاروۆتىڭ سوزىنشە، توبەلەس اراسىندا جۇرگەن ەكى قىز قورعاۋعا قۇقىعى بار كۋاگەر رەتىندە تانىلعان.

«تەرگەۋ امالدارى جۇرگىزىلىپ جاتىر. سونىڭ شەشىمىن كۇتەمىز»، - دەيدى سەرىك شالقاروۆ.

ول شەرزاتتىڭ سوققىعا جىعىلىپ جاتقانى كورسەتىلگەن ۆيدەو زەرتتەلىپ جاتقانىن جەتكىزدى.

«ارنايى توپ قۇرىلىپ، ولاردىڭ ءارقايسىنىڭ ىستەگەن ارەكەتىنە زاڭدى شەشىم بەرىلىپ جاتىر. سەبەبى ۆيدەودا ارتىنان كىم ەكەنىن تاني المايسىز. سوندىقتان ءارقايسىسى تەرگەۋدەن وتەدى. ول ءۇشىن ءبىراز ۋاقىت كەتەدى. قازىرگى تاڭدا جۇمىستىڭ جارتىسىنان كوبىن بىتىردىك. ال بەينە كامەرالارعا ءتۇسىپ قالعان ساتتەر ءوشىرىلدى دەگەن جالعان اقپارات. تەرگەۋشىلەر ۆيدەولاردى رەسمي الىپ، زەرتتەپ جاتىر»، - دەيدى سەرىك شالقاروۆ.

سونىمەن قاتار شالقاروۆ توبەلەستەن كەيىن قانشا قارۋ تاركىلەنگەنىن ايتتى.

«قازىرگى تاڭدا ءۇش پىشاق تاركىلەندى. ونىڭ ەكەۋى اس ءۇي پىشاعى. سونداي-اق ءبىر مىلتىق بار. قارۋ ەشقايدا تىركەلمەگەن. دەپارتامەنت ونى ساراپتامادان وتكىزىپ جاتىر»، - دەيدى سەرىك شالقاروۆ.

ايتا كەتەيىك، 4-قازانعا قاراعان ءتۇنى تالعاردا جانتۇرشىگەرلىك قىلمىس بولدى. قولىندا پىشاق پەن قارۋى بار ءبىر توپ جىگىت 16 جاستاعى شەرزات، اكەسى مەن اعاسىنا شابۋىل جاساعان.

شەرزاتتىڭ اكەسى جالعا دۇكەن الىپ، ساۋدا جاساۋمەن اينالىساتىن. ارتى ولىممەن اياقتالعان توبەلەس وسى دۇكەننەن باستالعان. ءبىر جىگىت دۇكەنگە كەلىپ، سىرا الىپ، اقشاسىن تولەمەي كەتە بارعان. شەرزاتتىڭ اكەسى سىرانىڭ اقشاسىن تولەۋدى تالاپ ەتكەن كەزدە جانجال تۋىنداعان.

شەرزات وسى ساتتە كليەنتتىڭ دۇكەننەن شىعىپ كەتۋىن سۇراعان. ءبىراق سىرا العان جىگىت دوستارىنا قوڭىراۋ سوعىپ، دۇكەنگە ءۇش كولىكپەن ءبىر توپ جىگىت كەلگەن. ءبىر توپ جىگىت شەرزاتتى تەپكىلەي باستاعان. بۇل ءساتتى تۇرعىندار ۆيدەوعا ءتۇسىرىپ العان. 10-سىنىپتا وقيتىن شەرزات اتا-اناسىنىڭ دۇكەنىنە كەزدەيسوق كەلگەن. سۋىق قارۋمەن كەلگەن بۇزاقىلار ەشكىمدى اياماپتى. قانسىراعان ءبىر وتباسىنىڭ مۇشەلەرى اۋرۋحاناعا جەتكىزىلگەن. كوپ ۇزاماي شەرزات جانساقتاۋ بولىمىندە كوز جۇمعان.

قازا تاپقان جىگىتتىڭ اتا-اناسى پوليتسەيلەر وقيعاعا قاتىستى ادامنىڭ ءبارىن ۇستاماعانىن ايتىپ، دابىل قاققان.

الماتى وبلىسىنىڭ پوليتسيا دەپارتامەنتى كامەلەتكە تولماعان بالانى ءولتىرۋ فاكتىسى بويىنشا پوليتسيا قىلمىستىق ءىس قوزعاعانىن حابارلادى. وقيعانىڭ بارلىق قاتىسۋشىلارى ۇستالدى جانە ۋاقىتشا ۇستاۋ يزولياتورىنا قامالدى.

وبلىستىق پروكۋراتۋرا وكىلدەرى بۇل وقيعا ءجىتى باقىلاۋدا ەكەنىن حابارلادى.