تالعار وقيعاسى بويىنشا قانداي ساراپتامالار جاسالۋدا

استانا. KAZINFORM - ادىلەت مينيسترلىگىنىڭ رەسمي وكىلى تالعات ءۋالي تالعار وقيعاسى بويىنشا قانداي ساراپتاما ءجۇرىپ جاتقانىن ايتتى.

«اتالعان شۋلى وقيعاعا بايلانىستى ءىستىڭ ءمان- جايىن ايتا المايمىز. سەبەبى ول ىشكى ىستەر مينيسترلىگىنىڭ مىندەتىنە جاتادى. ال سوت- مەديتسينالىق ساراپتامالارعا كەلسەك، 5 ءتۇرلى ساراپتاما تاعايىندالدى. ولار: ءمايىتتىڭ ەكسپەرتيزاسى، سول جەردەگى شىققان ءورتتىڭ سەبەپتەرىن انىقتاۋ ەكسپەرتيزاسى، فوتو- تەحنيكالىق ەكسپەرتيزا، مولەكۋرليارلى- گەنەتيكالىق ەكسپەرتيزا، بيولوگيالىق ەكسپەرتيزا، - دەدى ول.

تالعات ءۋالي ساراپتاماعا قانداي دا ءبىر قارۋ الىنعان، الىنباعانىن ايتۋعا قاقىسى جوق ەكەنىن جەتكىزدى.

ول ساراپتامالاردىڭ ۇشەۋى اياقتالىپ قۇقىق قورعاۋ ورگاندارىنا بەرىلدى. قالعاندارى زەرتتەلىپ جاتىر. تولىق ءمان- جايىن تەك ىشكى ىستەر مينيسترلىگىنەن بىلە الاسىزدار، - دەدى رەسمي وكىل.

ەسكە سالايىق، بۇعان دەيىن 4-قازاندا تالعار قالاسىنداعى توبەلەستەن 16 جاسار ءجاسوسپىرىم قايتىس بولعانىن جازعانبىز.

اشۋلى تالعارلىقتار ءجاسوسپىرىم ولىمىنە بايلانىستى نارازىلىققا شىقتى.

الماتى وبلىسىنىڭ پروكۋراتۋراسى كىسى ءولتىرۋ تۋرالى بۇل ءىس ەرەكشە باقىلاۋعا الىنعانىن رەسمي تۇردە حابارلادى.

ىشكى ىستەر ءمينيسترى ەرجان سادەنوۆ الماتى وبلىسى تالعار اۋدانىنداعى ءجاسوسپىرىمنىڭ ولىمىنە قاتىستى ءىستى جەكە باقىلاۋىنا الدى.

12-قازان تۇندە قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

18-قازان كۇنى الماتى وبلىسى پروكۋرورىنىڭ ورىنباسارى مەن تالعار اۋدانىنىڭ پروكۋرورى قىزمەتىنەن كەتتى.