ە س ق- نىڭ جابىق كىلتىن رۇقساتسىز پايدالانۋعا جاۋاپكەرشىلىك ەنگىزىلمەك
استانا. KAZINFORM - ەلەكتروندىق سيفرلىق قولتاڭبانىڭ جابىق كىلتىن رۇقساتسىز پايدالانۋعا جاۋاپكەرشىلىك ەنگىزىلمەك. بۇل تۋرالى اقپاراتتىق قاۋىپسىزدىك كوميتەتىنىڭ ءتوراعاسى رۋسلان ءابدىقالىقوۆ ايتتى.
ونىڭ اتاپ وتۋىنشە، كيبەرقاۋىپسىزدىك سالاسىنداعى جاعدايلاردىڭ وسۋىنە جاۋاپ رەتىندە سيفرلىق دامۋ مينيسترلىگى ازاماتتاردىڭ قۇقىقتارىن قورعاۋ جانە ەلدىڭ سيفرلىق ينفراقۇرىلىمىن نىعايتۋ ءۇشىن بەلسەندى شارالار قابىلداپ جاتىر. ازاماتتاردىڭ شاعىمدارىنا نەگىزدەلگەن جوسپاردان تىس تەكسەرۋلەر بارىسىندا بيومەتريكالىق يدەنتيفيكاتسيا جۇيەلەرىن ازىرلەۋشىلەر مەن شىعارماشىلىق ۇيىرمەلەر اراسىندا بۇزۋشىلىقتار انىقتالدى. ماسەلەن، 3-توقساندا تەكسەرۋلەر 4 ۇيىمدى قامتىدى. ناتيجەسىندە اتا-انالاردىڭ كەلىسىمىنسىز بالالاردىڭ بيومەتريالىق دەرەكتەرىن زاڭسىز جيناۋدىڭ 2 جاعدايى انىقتالدى. تەكسەرۋلەردىڭ قورىتىندىسى بويىنشا 332280 مىڭ تەڭگە كولەمىندە جالپى سومادا 2 اكىمشىلىك ءىس قوزعالدى.
مۇنان بولەك، مينيسترلىك جەكە دەرەكتەردىڭ تارالۋىنا جاۋاپكەرشىلىكتى ارتتىرۋ ماقساتىندا «اكىمشىلىك قۇقىق بۇزۋشىلىقتار تۋرالى» كودەكسكە وزگەرىستەر ەنگىزۋدى ۇسىنىپ وتىر. بۇل وزگەرىستەر جاۋاپكەرشىلىك مەرزىمىن جانە بۇزۋشىلىقتارعا سالىناتىن ايىپپۇلداردى ءۇش ەسەگە كوبەيتۋدى قامتيدى. سونداي-اق، ەلەكتروندىق سيفرلىق قولتاڭبانىڭ جابىق كىلتىن رۇقساتسىز پايدالانۋعا جاۋاپكەرشىلىك ەنگىزۋ جوسپارلانعان.
«ماڭىزدى قادام جىلىستاپ كەتۋدى باقىلاۋ جانە بۇزۋشىلاردى انىقتاۋ ءۇشىن بۇزىلعان دەرەكتەردىڭ ءبىرىڭعاي ءتىزىلىمىن جاساۋ بولادى. بۇل كيبەرقاۋىپسىزدىك سالاسىنداعى وقيعالارعا تيىمدىرەك جاۋاپ بەرۋگە مۇمكىندىك بەرەدى»، - دەدى رۋسلان ءابدىقالىقوۆ ورتالىق كوممۋنيكاتسيالار قىزمەتىندەگى بريفينگتە.
اۆتور
مارلان جيەمباي
