تالاسبەك اسەمقۇلوۆ بايقاۋى: الماتىدا كۇيشىلەر باق سىنادى
الماتى. KAZINFORM - الماتىدا جازۋشى، كۇيشى تالاسبەك اسەمقۇلوۆ اتىنداعى كۇيشىلەر مەن قالامگەرلەر بايقاۋى ءوتتى.
ۇيىمداستىرۋشىلار ايتۋىنشا، تالاسبەك تانۋ ادەبي قالامگەرلەر بايقاۋى وسىمەن 6 رەت، كۇيشىلەر بايقاۋى 5 رەت ۇيىمداستىرىلدى. بۇعان دەيىن 4 رەت كۇيشىلەر سايىسى ەلوردادا وتسە، بيىل العاش رەت ۇلتتىق اسپاپ شەبەرلەرى الماتىدا جينالدى.
بايقاۋدا ءادىلقازىلار القاسىنىڭ ءتوراعاسى بولعان مۇرات ءابۋزعازى تالاسبەك اسەمقۇلوۆتىڭ كۇي ونەرىنە قوسقان ۇلەسى وراسان زور ەكەنىن اتاپ ءوتتى.
- بايقاۋدىڭ باستى ماقساتى - تالاسبەك اسەمقۇلوۆتىڭ كۇيشىلىك ورىنداۋشىلىق ونەرىن دارىپتەۋ. ول كىسى كۇي ونەرىنە وتە كوپ ەڭبەك ءسىڭىردى. اسىرەسە، ابىلايحاننىڭ زامانداسى بولعان بايجىگىت كۇيشىنىڭ مۇراسىن تىكەلەي ءبىزدىڭ زامانعا تابىستاعان تالاسبەك اعامىز. شۇبارتاۋ، اياگوز وڭىرىندەگى بارلىق كۇيشىلەرگە جولىعىپ، بايجىگىتتىڭ كۇيلەرىن ۇيرەنگەن. ودان كەيىن تالاسبەك اعامىز 1975-جىلى «مەلوديا» فيرماسىنان بايجىگىت كۇيلەرىنىڭ كۇيتاباعىن شىعاردى. سونداي-اق اتتارى بەلگىسىز ساقبەكە، نۇرعىز، قىزىلمويىنقۋاندىق، ءوزىنىڭ اتاسى ءجۇنىسبايدىڭ كۇيلەرىن جەتكىزدى. كەيىنگى كەزدە ءوز جانىنان دا كۇيلەر شىعاردى، - دەدى ول.
بايقاۋدىڭ نەگىزگى تالاپتارىنىڭ ءبىرى - تالاسبەك اسەمقۇلوۆتىڭ مانەرىنە جاقىنداتىپ كۇي تارتۋ بولدى. جالپى سايىسقا 14 جاستاعى بالادان تالاي جارىستاردا توپ جارىپ جۇرگەن دۇلدۇلدەرگە دەيىن 13 كۇيشى قاتىستى. ناتيجەسىندە باس جۇلدە جارقىننۇر ەرجاناتقا بۇيىردى. ەكىنشى - نۇرالي سايات ۇلى، ءۇشىنشى - ماۋلەت اعاناس بولدى. تالاسبەك اسەمقۇلوۆتىڭ اتاسى ءجۇنىسباي ستامبايەۆ اتىنداعى ارنايى جۇلدە ارمان جانىبەكوۆكە بەرىلدى. ال اسەمقۇلوۆتار وتباسىنىڭ اتىنان ارنايى جۇلدەنى بايمۇحات ساعي الدى.
ەسكە سالايىق، جازۋشى، كينودراماتۋرگ، كۇيشى تالاسبەك اسەمقۇلوۆ 1955-جىلى 1-تامىزدا سەمەي وبلىسى اياكوز اۋدانى اقتوعاي تەمىرجول ستانساسىندا دۇنيەگە كەلگەن. 1976-1980-جىلدارى الماتى قالاسى، اباي اتىنداعى پەداگوگيكا ينستيتۋتى فيلولوگيا فاكۋلتەتىندە ءبىلىم العان.
رەسپۋبليكالىق باسپا سوزدە «اتايى»، «كارى ات»، «ارىلۋ» سياقتى اڭگىمەلەرى، «شىمدان» پوۆەسى جانە مۋزىكانتتاردىڭ ومىرىنە ارنالعان «تال ءتۇس» رومانى جارىق كورگەن. «ماڭگىلىك سارى» انتولوگياسىنا 20 دان استام، «قازاقتىڭ مىڭ كۇيى» (2009) انتولوگياسىنا 40 تان استام كۇيى ەنگەن. 2010-جىلى پاريجدەن «تاتتىمبەتتىڭ مۇراسى» اتتى cd- ديسكى شىققان.
تالاسبەك اسەمقۇلوۆ 2014-جىلى دۇنيەدەن ءوتتى.
