تالاپكەرلەردىڭ 74 پايىزى تەستىلەۋدى قازاق تىلىندە تاپسىرعان
استانا. KAZINFORM - ۇ ب ت باستالعاننان بەرى 164 مىڭنان استام تەستىلەۋ وتكىزىلدى. تالاپكەرلەردىڭ %74- ى تەستىلەۋدى قازاق تىلىندە، %26- ى ورىس تىلىندە جانە 136 ادام اعىلشىن تىلىندە تاپسىرعان. بۇل تۋرالى عىلىم جانە جوعارى ءبىلىم مينيسترلىگى ءمالىم ەتتى.
ۆەدومستۆونىڭ مالىمەتىنشە، ءۇشىنشى اپتانىڭ قورىتىندىسىنا ساي تالاپكەرلەردىڭ %69- ى شەكتى بال جيناعان. بەس ءپان بويىنشا ورتاشا بال 65 ءتى قۇرادى. ەڭ جوعارى ناتيجە - 140 بال - تۇركىستان وبلىسىنان ءابىلحان جانىبەك ءبىرىنشى اپتادا كورسەتتى.
- قازىرگى تاڭدا تەستكە قاتىسۋشىلاردىڭ باسىم بولىگى، اتاپ ايتقاندا، %18- ى «ماتەماتيكا- فيزيكا»، %15- ى «بيولوگيا-حيميا» پاندەر كومبيناتسياسىن تاپسىردى. %14- ى «شىعارماشىلىق ەمتيحان» كومبيناتسياسىن تاڭداعان. ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ۇ ب ت- عا 477 تالاپكەر قاتىسقان، - دەلىنگەن حابارلامادا.
تالاپكەرلەردىڭ تەست تاپسىرمالارىنىڭ مازمۇنى بويىنشا تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرۋ قۇقىعى بار. تەحنيكالىق سەبەپتەر بويىنشا اپەللياتسيا تىكەلەي تەستىلەۋ كەزىندە قابىلدانادى. ناتيجەلەرى بار سەرتيفيكاتتار اپەللياتسيا قاراستىرىلعاننان كەيىن جەكە كابينەتتەردە قولجەتىمدى بولادى.
- ۇ ب ت باستالعالى 206 ەرەجە بۇزعان جاعداي تىركەلگەن. 98 تالاپكەر سمارتفونداردى، شپارگالكالاردى جانە باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلدى. تاعى 108 ادام تەستىلەۋ كەزىندە ەرەجەلەردى بۇزعانى ءۇشىن اۋديتوريادان شىعارىلدى، ولاردىڭ ناتيجەلەرى جويىلدى. وزگە ادامداردىڭ ورنىنا كىرۋ فاكتىلەرى انىقتالعان جوق، - دەپ حابارلادى مينيسترلىكتەن.
2025 -جىلعى ۇ ب ت اياقتالعاننان كەيىن 31 -قازانعا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ۇ ب ت ناتيجەلەرى جويىلادى.
جالپى تەستىلەۋگە قاتىسۋعا 216 مىڭ تالاپكەردەن 399 مىڭعا جۋىق ءوتىنىش كەلىپ تۇسكەن.
ەسكە سالا كەتەيىك، بۇعان دەيىن ج و و- عا قۇجات قاشان قابىلداناتىنى تۋرالى جازعان ەدىك.
