تالاپ - جوق، ءۇمىت - مول ءبىر حالىقپىز- احمەت بايتۇرسىن ۇلى
استانا. قازاقپارات - اقىن، ادەبيەت زەرتتەۋشىسى، عالىم، قازاق ءتىل ءبىلىمىنىڭ اتاسى، تۇركىتانۋشى، پۋبليسيست، پەداگوگ، اۋدارماشى، قوعام قايراتكەرى احمەت بايتۇرسىن ۇلىنىڭ قاناتتى سوزدەرىن ۇسىنىپ وتىرمىز:
بالام دەگەن جۇرت بولماسا - جۇرتىم دەيتىن بالا قايدان شىقسىن!
ءتىلى جوعالعان جۇرتتىڭ ءوزى دە جوعالادى.
بالانى ۇلشا تاربيەلەسەڭ - ۇل، قۇلشا تاربيەلەسەڭ - قۇل بولماقشى.
جەر ماسەلەسى - قازاقتىڭ ءتىرى ءيا ءولى بولۋىنىڭ ماسەلەسى.
مويىنداعى بورىشتى ءبىلۋ - ءبىلىمنىڭ ءىسى، بورىشتى تولەۋ - ادامشىلىق ءىسى.
مەكتەپتىڭ جانى - مۇعالىم.
مۇعالىمى قانداي بولسا - مەكتەبى دە سونداي بولماق.
ادامعا ەڭ قىمبات نارسە - جۇرت قامى، جۇرت ءىسى.
زامانا سيپاتى: ءبىلىمى كوپتەر جۇرت بيلەمەي، مالى كوپتەر جۇرت بيلەر زامان.
ءسوزدىڭ ەڭ ۇلىسى - تاريح.
ەلدە جوق رۋح - اقىن سوزىنە قايدان كەلسىن؟!
كوركەم ءسوز - كوڭىل ءتىلى، جالاڭ ءسوز - زەيىن ءتىلى.
شەجىرە، زامانحات، ءومىربايان، مىنەزدەمە - ءبارى دە تاريحتىڭ جەمى ەسەبىندەگى نارسەلەر.
ماقال - تاجىريبەدەن شىققان اقيقات تۇرىندە ايتىلاتىن ءسوز.
كۇنەلتۋ ءۇشىن - اس كەرەك، اس ىستەۋگە - كۇش كەرەك، كۇشتى جۇمساۋعا - ەس كەرەك.
اركىم ءوزى جاقسى بىلەتىن نارسەسىن سىناۋى كەرەك.
الۋشى دا، بەرۋشى دە - وزىنە جاعىمدى جاعىن ىزدەيدى.
كەيبىر ىستەردى ىستەۋ كەرەك بولا تۇرا ىستەۋگە بولمايدى.
وتكەندى قۋعاندى قويىپ - وسى كۇيىڭدى جوندەۋگە ءجون ىزدەۋ كەرەك.
جۇرت كەرەگىن بىلەتىندەر - كوپ، ىستەيتىندەر - از.
تالاپ - جوق، ءۇمىت - مول ءبىر حالىقپىز.
بىرەۋ - جۇمىس قىلايىن دەسەم تۇرعان جەرىم جامان دەيدى، بىرەۋ - ماڭايىمداعى ەلىم جامان دەيدى: بۇلاردىڭ ءبارى دە - بوس ءسوز.
ءبىزدىڭ زامانىمىز - وتكەن زاماننىڭ بالاسى، كەلەر زاماننىڭ اتاسى.
