تاەكۆوندودان پاريج وليمپياداسىنىڭ جولدامالارى قىتايدا ساراپقا سالىنادى

استانا. KAZINFORM - تاەكۆوندودان پاريج وليمپياداسىنىڭ جولدامالارى ساراپقا سالىناتىن ازيا ىرىكتەۋ تۋرنيرى قىتايدىڭ تايان قالاسىندا وتەدى.

اتالعان ىرىكتەۋ تۋرنيرى 15-16- ناۋرىز كۇندەرىنە جوسپارلانعان.

ازيا ىرىكتەۋ تۋرنيرىندە قازاقستان اتىنان ءتورت سپورتشى قاتىسپاق.

ولار - ماريا سيەۆوستيانوۆا (57 كەلىگە دەيىن)، جانسەل دەنيز (67 كەلىدەن جوعارى)، ساميرحون اباباكيروۆ (58 كەلىگە دەيىن) جانە باتىرحان تولەۋعالي (80 كەلىگە دەيىن) پاريجدەگى وليمپيادا ويىندارىنىڭ جولدامالارى ءۇشىن تالاسادى.

ايتا كەتسەك، ازىرگە قازاقستان قۇراماسىنىڭ قورجىنىندا سپورتتىڭ 8 ءتۇرى بويىنشا 19 جولداما بار. سپورتشىلارىمىز ساداق اتۋدان – 4، تاس جولداعى ۆەلوسپورتتان – 3، نىسانا كوزدەۋدەن – 5، قازىرگى بەسسايىستان – 2، بوكستان – 2، گرەك-ريم كۇرەسىنەن – 1، ەركىن كۇرەستەن – 1، سپورتتىق گيمناستيكادان - 1 جولداما جەڭىپ العان.

فرانسيا تورىندە الاۋى تۇتاناتىن XXXIII جازعى وليمپيادا ويىندارى وسى جىلدىڭ 26- شىلدەسى مەن 11- تامىزى ارالىعىندا وتەدى.

اۆتور كۇنسۇلتان وتارباي