تاكسي جۇرگىزۋشىسىن ولتىرگەن ەكى جاس ءوسپىرىم 12 جىلعا سوتتالدى
الماتى. KAZINFORM - الماتىدا تاكسي جۇرگىزۋشىسىن ولتىرگەن كامەلەتكە تولماعان ەكى بالا 12 جىلعا باس بوستاندىعىنان ايىرىلدى.
الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا القابيلەردىڭ قاتىسۋىمەن كامەلەتكە تولماعان گ. جانە ح. -عا قاتىستى ءىس قارالدى.
«2023-جىلدىڭ جازىندا سوتتالۋشىلار گ. مەن ح. شىمكەنت-الماتى باعىتىنا تاكسي شاقىرتقان. دىتتەگەن جەرىنە جەتكەن كەزدە، ايىپتالۋشىلار الدىن الا ءسوز بايلاسۋ ارقىلى 40 مىڭ تەڭگە كولەمىندەگى قىزمەت اقىسىن تولەمەۋ ماقساتىندا تاكسي جۇرگىزۋشىسى پ. -نى ولتىرگەن»، - دەپ حابارلادى الماتى قالاسى سوتىنىڭ باسپا ءسوز قىزمەتى.
سوت ايىپتالۋشىلاردىڭ جۇرگىزۋشىگە بىرنەشە رەت پىشاق سۇققانىن جانە سونىڭ سالدارىنان ەر ادام وقيعا ورنىندا قازا تاپقانىن انىقتادى. ارتىنشا سوتتالۋشىلار جابىرلەنۋشىنىڭ كولىگى مەن 80 مىڭ تەڭگە تۇراتىن ۇيالى تەلەفونىن ۇرلاپ كەتكەن. پروكۋرور ايىپتالۋشىلاردى كىنالى دەپ تانىپ، ءارقايسىسىن 10 جىلعا باس بوستاندىعىنان ايىرۋدى سۇرادى.
الايدا جاس وسپىرىمدەر كىناسىن مويىندامادى.
«القابيلەر القاسىنىڭ ۇكىمىمەن سوتتالۋشىلار گ. جانە ح. كىنالى دەپ تانىلدى. ءارقايسىسى 12 جىلدان باس بوستاندىعىنان ايىرىلدى»، - دەپ حابارلادى سوتتان.
ۇكىم زاڭدى كۇشىنە ەنگەن جوق.
