تاكسي جۇرگىزۋشىلەرى سالىقتى قالاي تولەيدى

استانا. KAZINFORM -قارجى مينيسترلىگىنىڭ مەملەكەتتىك كىرىستەر كوميتەتى جاڭا سالىق كودەكسى جوباسىنىڭ كەيبىر ەرەجەلەرىن جاريا ەتتى.

«قازىرگى ۋاقىتتا جاڭا سالىق كودەكسىن ازىرلەۋ جونىندەگى جۇمىس توبى قۇرىلدى. ول 2025 -جىلدان قولدانىسقا ەنگىزىلەدى. كودەكس اياسىندا ارناۋلى سالىق رەجيمدەرىن رەفورمالاۋ جانە ءوزىن ءوزى جۇمىسپەن قامتىعاندار ءۇشىن سالىق رەجيمىن قۇرۋ بويىنشا ماسەلەلەر دە قاراستىرىلىپ جاتىر»، - دەپ اتاپ وتەدى مەملەكەتتىك ورگان اگەنتتىكتىڭ رەسمي ساۋالىنا بەرگەن جاۋابىندا.

كوميتەت 2023 -جىلدىڭ قىركۇيەگىندە ەڭبەك جانە حالىقتى الەۋمەتتىك قورعاۋ مينيسترلىگىمەن بىرگە مەملەكەت باسشىسىنىڭ «حالىق بىرلىگى جانە جۇيەلى رەفورمالار - ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىندا جۇمىسپەن قامتۋدىڭ جاڭا تۇرلەرىن رەتتەۋ تەتىكتەرىن ازىرلەۋ باعىتىندا بەرگەن تاپسىرمالارىن ورىنداۋعا كىرىستى. ونىڭ ىشىندە ينتەرنەت-پلاتفورمالار ارقىلى جۇزەگە اسىرىلاتىن جۇمىس تۇرلەرى بار. ينتەرنەت-پلاتفورمالار ارقىلى قىزمەت كورسەتەتىن تۇلعالارعا سالىقتىق اكىمشىلەۋدىڭ وزگە دە تۇرلەرىن قولدانۋ بويىنشا پيلوتتىق جوبا جۇرگىزىلىپ جاتىر.

«پلاتفورمالىق جۇمىسپەن قامتۋ جونىندەگى پيلوتتىق جوبا ينتەرنەت-پلاتفورما ارقىلى تاكسي قىزمەتىن كورسەتەتىن، كۋرەرلىك جەتكىلىمدى ورىندايتىن كۋرەردى (تاكسي جۇرگىزۋشىسىن) جەڭىلدەتىلگەن تارتىپپەن تىركەۋدى ءارى سالىقتىق مىندەتتەمەلەرىن ورىنداۋىن كوزدەيدى. تاكسي جۇرگىزۋشىلەرى ءۇشىن پيلوتتىق باسىمدىقتارى: تاكسي پاركتەرىنىڭ دەلدالدىق قىزمەتى جويىلادى، بۇل اقشا قاراجاتىن ۇنەمدەۋگە جانە ونى سالىق جانە الەۋمەتتىك تولەمدەرگە تولەۋگە مۇمكىندىك بەرەدى»، - دەپ اتاپ وتەدى ۆەدومستۆودان.

سوعان وراي جۇرگىزۋشى الەۋمەتتىك قامتاماسىز ەتۋ جۇيەسىنە تارتىلادى، جەكە كاسىپكەر رەتىندە وڭاي تىركەلەدى (سالىق ورگانىنا بارماي- اق تىركەلۋ)، تاپقان تابىسىنان 1 پايىز مولشەرىندە سالىق تولەيدى، ەسەپ-قيساپ بەرۋ، سالىق جانە الەۋمەتتىك تولەمدەر اۋدارۋ مىندەتتەمەسى بولمايدى.

بۇل رەتتە الەۋمەتتىك تولەمدەر تاكسي جۇرگىزۋشىسىنىڭ تاپقان تابىس سوماسىنا بايلانىستى ايقىندالادى. سونىمەن قاتار پيلوتتىق جوباعا Glovo، Wolt، InDrive سىندى كومپانيالاردى دا تارتۋ جوسپارلانىپ وتىر.

اۆتور

مارلان جيەمباي