تاشكەنتتە تۇركى ەلدەرىنىڭ ۋنيۆەرسيتەتى اشىلادى

استانا. قازاقپارات - تاشكەنتتە تۇركى ەلدەرىنىڭ حالىقارالىق ۋنيۆەرسيتەتى اشىلادى، دەپ حابارلايدى 24KZ.

ءبىلىم ورداسى ينجەنەريا، قۇرىلىس، مەديتسينا، كيبەرقاۋىپسىزدىك جانە IT سالاسى بويىنشا مامان دايارلايدى. وقۋ باعدارلاماسى الەمنىڭ ۇزدىك مىڭ ۋنيۆەرسيتەتىنىڭ تىزىمىنە ەنگەن ىرگەلى ءبىلىم وردالارىنان تاڭدالعان. كادرلىق قۇرام تۇركى ەلدەرىنەن جاساقتالادى.

تۇركى ەلدەرىنىڭ حالىقارالىق دارەجەدەگى ۋنيۆەرسيتەتتەرى ورتالىق ازيادا جوق ەمەس. ماسەلەن، ەلىمىزدەگى قوجا احمەت ياساۋي اتىنداعى ءبىلىم ورداسى 1991 -جىلى اشىلعان. وسى كۇنگە دەيىن ون مىڭداعان شاكىرت دايىندادى. دەمەك تاجىريبە دە بار. ال تاشكەنتتە اشىلاتىن وقۋ ورىنىندا زاماناۋي ماماندىقتارعا باسىمدىق بەرىلەدى. اسىرەسە كيبەرقاۋىپسىزدىك، ينجەنەريا سياقتى سۇرانىسقا يە سالالارعا سالماق سالىنادى.

وتابەك بازاروۆ، وزبەكستان جوعارى ءبىلىم مينيسترلىگى يننوۆاتسيالار باسقارماسىنىڭ باسشىسى:

- ءبىز ەڭ الدىمەن تۇركى مەملەكەتتەرىنىڭ ىشىندە حالىقارالىق دارەجەدەگى مىقتى مامانداردى وسى ۋنيۆەرسيتەتكە شاقىرامىز. ولارعا قويىلاتىن باستى تالاپ، وقىتۋشى قۇرام الەمنىڭ ۇزدىك دەگەن مىڭ جوعارى وقۋ ورنىنىڭ تىزىمىنە ەنگەن ءبىلىم ورداسىن اياقتاعان ديپلومى بولۋى ءتيىس. سودان كەيىن باۋىرلاس مەملەكەتتەردىڭ وقىتۋ ءداستۇرى ۇقساس. ول دا نازارعا الىنىپ وتىر.

جالپى العاندا كادرلىق قۇرامدى جاساقتاۋدا ماسەلە تۋىندامايدى. پروفەسسورلاردىڭ ۆيزا ماسەلەسى، جۇمىس جايى بارلىعى شەشىلەدى. ۋنيۆەرستيتەتتىڭ ءبىلىم باعدارلاماسى الەمنىڭ ۇزدىك جوعارعى وقۋ ورىندارىنىڭ تاجىريبەسىنە نەگىزدەلەدى. ونىڭ ىشىندە تۇركيانىڭ ىرگەلى ءبىلىم وردالارى بار.

جاڭا ۋنيۆەرسيتەت قىركۇيەك ايىندا اشىلادى. وسى ارالىقتا جوعارعى وقۋ ورىننىڭ وقىتۋشىلىق قۇرامى انىقتالىپ، تۇركى ەلدەرىنىڭ جاس تۇلەكتەرىن ۋنيۆەرسيتەتكە شاقىرۋ ناۋقانى جۇرگىزىلەدى. جالپى ءبىلىم ورداسىنىڭ قۇرىلۋى باۋىرلاس ەلدەر ينتەگراتسياسىنىڭ كەزەكتى ءبىر بەلەسى بولماق.

اۆتورى: دۋلات نۋركين