تاشكەنتتە ناۋرىزدى قالاي تويلاپ جاتىر
تاشكەنت. KAZINFORM - وزبەكستان استاناسىندا ناۋرىز مەيرامىنا وراي مەرەكەلىك سەيىل، كونسەرت، قولونەر شەبەرلەرىنىڭ كورمەسى مەن ۇلتتىق ويىندار ۇيىمداستىرىلىپ، تۇرعىندارعا تاتتىلەر تاراتىلۋدا، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
مەرەكەلىك شارالار تاشكەنت قالاسىنىڭ بارلىق بولىگىندە كەڭ اۋقىمدا ءوتىپ جاتىر.
كوشەلەردەن ەستىلگەن كەرنەي مەن سىرنايدىڭ سازى مەرەكەنىڭ باستالعانىنان حابار بەرىپ، بارشا تۇرعىندى مەيرامدى تويلاۋعا شاقىرۋدا. ال، فولكلورلىق-ەتنوگرافيالىق توپتاردىڭ ءان-بيلەر ارقىلى بەينەلەپ، جەتكىزىپ جاتقان وزبەك ۇلتى مادەنيەتىنىڭ قايتالانباس بىرەگەي بولمىسى كورەرمەندەردى باۋراپ الادى.
سونداي-اق، مەرەكەگە وراي ۇيىمداستىرىلعان قويىلىمدار، ۇلتتىق كوستيۋمدەر كورسەتىلىمى، قولدانبالى ونەر كورمەسى، بالالاردىڭ كوڭىلدى بيلەرى بارلىعىنا كوتەرىڭكى كوڭىل-كۇي سىيلايدى.
بۇلارمەن قاتار، تاشكەنتتە ناۋرىزدى باي وزبەك اسحاناسىنىڭ تاعامدارىنسىز ەلەستەتۋ مۇمكىن ەمەس. قازاندا - پالاۋ، تاندىردا - سامسا، كەسەدە - كوك شاي جانە كوكتەم مەرەكەسىنىڭ باستى تاعامى - سۋمالياك. بۇل ەجەلگى كەزەڭدەردەن بەرى بيدايدان دايىندالاتىن ۇلتتىق اس سانالادى، ول ۇلكەن قازاندا ءبىر تاۋلىك بويى قايناتىلادى. ونىڭ قۇرامى كوكتەم مەزگىلىندە السىرەيتىن ادام ازعاسىنا تاپتىرمايتىن دارۋمەندەرگە تولى.
ناۋرىز بۇگىنگى زامانعا دەيىن قۇندىلىقتارىن جوعالتپاي جەتىپ، قازىرگى ءداۋىر مەن تاريحتى بايلانىستىراتىن كۇشكە اينالعانداي. سوندىقتان وزبەكستاندىقتار بۇل كۇندەرى ادەت-عۇرىپ، سالت-ءداستۇرىن ساقتاي وتىرىپ، كەلەر ۇرپاققا تابيعاتپەن ۇندەستىكتە ءومىر ءسۇرۋ پريتسپتەرىن دارىپتەۋگە دەن قويادى.
اۆتور
ءاليحان اسقار
