تاشكەنت كوشەلەرىندە روبوت- پوليتسەيلەر كەزەكشىلىكتە ءجۇر

تاشكەنت. KAZINFORM - قوعامدىق ءتارتىپتى باقىلايتىن روبوتتار تاشكەنت كوشەلەرىنە كەزەكشىلىككە شىقتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

وزبەكستاننىڭ جول قوزعالىسى قاۋىپسىزدىگى قىزمەتىنەن ءمالىم ەتكەندەي، روبوت پروفيلاكتيكا ينسپەكتورىنىڭ كومەكشىسى قىزمەتىن اتقارادى.

ونىڭ مىندەتى - قالا مەن اۋىلدىق جەرلەردە قۇقىق بۇزۋدىڭ الدىن الۋ.

ينسپەكتوردىڭ ءتورت دوڭگەلەكتى كومەكشىسى 180 جانە 360 گرادۋس اۋماقتى قامتيتىن ساپالى كامەرا، ارنايى شام، GPS، اۋديو، ۆيدەو جازبا فۋنكتسياسىمەن جابدىقتالعان.

روبوت بارلىق قۇقىق بۇزۋشىلىقتاردى انىقتاۋعا قاۋقارلى.

ءتىپتى قوقىستى بەلگىلەنبەگەن جەرگە تاستاۋ فاكتىلەرىن دە تىركەيدى.

كەيىن دەرەكتەر ونلاين رەجيمدە پروفيلاكتيكا جونىندەگى ينسپەكتوردىڭ پلانشەتىنە تۇسەدى.