تاعى ءبىر قازاقستاندىق تورەشى پاريج وليمپياداسىنا شاقىرتۋ الدى
كەلەسى جىلى پاريجدە وتەتىن XXXIII جازعى وليمپيادا ويىندارىنا تاعى ءبىر قازاقستاندىق تورەشى قازىلىق ەتۋگە شاقىرتۋ الدى، دەپ حابارلايدى Kazinform.
ۇلتتىق وليمپيادا كوميتەتىنىڭ حابارلاۋىنشا، قازاقستاندىق سپورتتىق گيمناستيكا تورەشىسى تيمۋر امىربەكوۆ حالىقارالىق گيمناستيكا فەدەراتسياسىنان 2024-جىلى پاريجدە وتەتىن جازعى وليمپيادادا تورەلىك ەتۋگە شاقىرتۋ العان.
بۇل - قازاقستاندىق مامان قازىلىق ەتەتىن ءتورتىنشى جازعى وليمپيادا ويىندارى بولماق.
تيمۋر امىربەكوۆ بۇعان دەيىن 2004، 2012 جانە 2016-جىلعى ءتورتجىلدىقتىڭ باستى دودالارىندا تورەشى بولعان.
ەستەرىڭىزگە سالا كەتەيىك، وسىعان دەيىن كوركەم گيمناستيكادان قازاقستاندىق تورەشى الۋا بەكتۇروۆا دا پاريج وليمپياداسىنا شاقىرتۋ العانىن جازعان بولاتىنبىز.
XXXIII جازعى وليمپيادا 2024-جىلى پاريجدە 26- شىلدە مەن 11- تامىز ارالىعىندا وتەدى.
جازعى ويىندار بۇعان دەيىن فرانسيادا ەكى مارتە ۇيىمداستىرىلعان بولاتىن.
الەمدىك دارەجەدەگى سپورت سايىسىنىڭ جالاۋى پاريجدە 1900 جانە 1920-جىلى جەلبىرەگەن ەدى.
اۆتور كۇنسۇلتان وتارباي
