تابيعاتتى تالقانداپ جاتىر: جەتىسۋلىق بەلسەندىلەر دابىل قاقتى
تالدىقورعان. KAZINFORM - جەتىسۋلىق ءبىر توپ بەلسەندى كوكسۋ وزەنىنىڭ جاعاسىندا ءجۇرىپ جاتقان قۇرىلىس جۇمىستارىنا نارازى. جەلىگە تاراعان جازباعا قاتىستى جەتىسۋ وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسى جاۋاپ بەردى.
جەتىسۋ وبلىسىنداعى بەلسەندىلەر كەربۇلاق اۋدانى، كوكسۋ وزەنى ماڭىندا بەلگىسىز بىرەۋلەردىڭ وزەن ماڭىن ارنايى تەحنيكامەن قازىپ جاتقانىن جەلىگە جاريالاعان ەدى.
ايتۋلارىنشا ەشقانداي ەسكەرتپەسىز الدەكىمدەر تابيعاتتى ءبۇلدىرىپ، زاڭسىز قۇرىلىس جۇرگىزىپ جاتىر. وبلىس تۇرعىندارى مەن دەمالۋشىلارعا تاپتىرمايتىن مەكەندى تەحنيكامەن تاپتاپ، تاسىن قوپارعاندارعا نارازىلىق بىلدىرگەندەر ءماجىلىس دەپۋتاتتارىنا مۇنى نازارعا الۋدى ءوتىندى. نارازى توپتىڭ ۇندەۋىنە جەتىسۋ وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسى جاۋاپ بەردى.
- جەتىسۋ وبلىسى كەربۇلاق اۋدانىندا رۋدنيچنىي سەس قۇرىلىسىن سالۋ ءۇشىن 3,7 گەگتار جەر ۋچاسكەسى وبلىس اكىمىنىڭ (13.08.2020 ج. 301-) قاۋلىسىمەن 2025-جىلدىڭ 1-شىلدەسىنە دەيىن «ەنەرگوبيلدسەرۆيس» ج ش س- نە بەرىلگەن بولاتىن. اتالعان جوبا بويىنشا قوعامدىق تالقىلاۋلار 2024-جىلعى 11-18-ناۋرىز ارالىعىندا ءوتتى. قوعامدىق تىڭداۋلار بارىسىندا جۇرتشىلىق تاراپىنان ەسكەرتۋلەر مەن ۇسىنىستار تۇسكەن جوق. «ەنەرگوبيلدسەرۆيس» ج ش س تاراپىنان رۋدنيچنىي سەس-1، 2 قۇرىلىسىنىڭ جوبالىق قۇجاتتاماسىن تۇزەتۋگە (كوررەكتيروۆكا) بايلانىستى 2024-جىلعى 26-ناۋرىزدا جۇمىس جوباسىن «قورشاعان ورتانى قورعاۋ» ءبولىمى قوسىلىپ، «جەتىسۋ وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىنا جولداندى. باسقارما مەملەكەتتىك ەكولوگيالىق ساراپتامانىڭ وڭ قورىتىندىسىن شىعاردى. قازىر باسقارما باسشىسى كەربۇلاق اۋدانى جانە تەكەلى قالاسى اكىمىنىڭ ورىنباسارلارىنىڭ، سونداي-اق «ەنەرگوبيلدسەرۆيس» ج ش س وكىلىنىڭ قاتىسۋىمەن كەڭەس وتكىزدى. جيىن بارىسىندا بارلىق ءمان-جاي انىقتالعانعا دەيىن قۇرىلىستى توقتاتۋعا، سونداي-اق رۋدنيچنىي سەس-1، 2 قۇرىلىسى بويىنشا مۇددەلى جۇرتشىلىقتىڭ قاتىسۋىمەن جينالىس وتكىزۋ تۋرالى شەشىم قابىلداندى»، - دەدى جەتىسۋ وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسى.
ەسكە سالايىق وسىعان دەيىن جەتىسۋ وبلىسىندا اۋانىڭ لاستانۋ دەڭگەيى تومەن ەكەنىن جازعان ەدىك.
