ەت ساپاسىن تەكسەرۋ ءۇشىن QR كود ەنگىزىلەدى
استانا. قازاقپارات - قازاقستاندا مالدى تەكسەرىسسىز سويۋعا جول بەرمەۋ ماقساتىندا ۆەتەريناريالىق تەكسەرىس جانە سويعاننان كەيىنگى ۆەتەريناريالىق-سانيتاريالىق ساراپتامانى وتكىزۋ ءۇشىن اۋىل شارۋاشىلىعى مينيسترلىگى «ەتتى ۆەتەريناريالىق- سانيتاريالىق ساراپتاۋ» مودۋلىن ازىرلەدى، - دەپ حابارلايدى Massaget.kz.
بۇل جۇيە مال سوياتىن ورىنداردا جانە ساۋدا نىساندارىندا ۆەتەريناريالىق-سانيتاريالىق ساراپتامادان وتكەننەن كەيىن ساراپتاما اكتىسىن بەرۋدىڭ بيزنەس پروتسەستەرىن اۆتوماتتاندىرادى، سونداي-اق، جانۋاردىڭ تولىق ومىرلىك سيكلى تۋرالى اقپاراتى بار QR كود ەنگىزىلەدى. بۇل QR ەت ساتاتىن ورىنداردا ورنالاستىرىلادى. وسىلايشا مالدى ۆەتەرينارلىق تەكسەرىسسىز جانە اعزالاردىڭ ساراپتاماسىنسىز سويۋدىڭ الدىن الۋعا مۇمكىندىك بەرەدى.
«قازىر بۇل جوبا ىسكە قوسىلىپ، وبلىستار مەن رەسپۋبليكالىق ماڭىزى بار قالالاردا جۇمىس ىستەپ جاتىر. وعان مال سوياتىن 1664 ورىن، ۆەتەرينارلىق-سانيتارلىق ساراپتاما زەرتحانالارى، ساۋدا ورىندارى قوسىلعان. جۇيەدە 1470-تەن اسا ۆەتەرينار، ۆەتەريناريالىق-سانيتاريالىق ساراپتاما زەرتحاناسىنىڭ قىزمەتكەرى جانە مەملەكەتتىك ۆەتەريناريالىق-سانيتاريالىق ينسپەكتورلار تىركەلگەن»، - دەپ جازىلعان حابارلامادا.
QR كود ارقىلى 117 مىڭنان اسا ۆەتەريناريالىق انىقتاما جانە 438 مىڭ ساراپتاما قورىتىندىسى شىعارىلعان.
جۇيە رەسەي فەدەراتسياسىمەن شەكارالاس شارباقتى ۆەتەرينارلىق باقىلاۋ پۋنكتىندە سىناقتان ءساتتى وتكەن.
