سەگىز وبلىستا تاسقىن قاۋپى جوعارى - ەرلان نىسانبايەۆ
استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ ۇكىمەت وتىرىسىندا تاسقىن قاۋپى جوعارى ايماقتاردى اتادى.
- 11- ناۋرىزداعى جاعداي بويىنشا، ەل اۋماعىنىڭ 71 پايىزى قار جامىلعان. بۇل وتكەن اپتامەن سالىستىرعاندا 15 پايىزعا از. ەلىمىزدىڭ وڭتۇستىگىندە قىزىلوردا، تۇركىستان جانە جامبىل وبلىستارىندا، ەلدىڭ باتىسىنداعى ب ق و، اتىراۋ جانە ماڭعىستاۋ وبلىستارىندا قار ەرىپ جاتىر. ناۋرىز ايىندا تەمپەراتۋرانىڭ كوتەرىلۋى مەن جاڭبىر جاۋعان جاعدايدا تاۋ وزەندەرىندە ەرىگەن قار سۋىنىڭ اسەرىنەن جوعارى تاسقىن ءجۇرۋى مۇمكىن، - دەدى ول.
ايتۋىنشا، ورتالىق، سولتۇستىك جانە شىعىس ايماقتاردا قار ءالى قالىڭداپ جاتىر.
- ناۋرىز ايىندا جاۋىن-شاشىن مولشەرى ايلىق نورمادان ەكى ەسە جانە ودان دا كوپ تۇسەدى دەپ كۇتىلۋدە. مىسالى، استانادا ايلىق جاۋىن- شاشىن مولشەرى ءبىرىنشى ونكۇندىكتە عانا ءتۇسىپ ۇلگەردى.
ناۋرىز جانە ءساۋىر ايلارى ادەتتەگىدەن جىلىراق بولادى دەپ كۇتىلۋدە، سونداي-اق ەلىمىزدىڭ باسىم بولىگىندە جاۋىن-شاشىن مول بولادى، بۇل كوكتەمنىڭ تەز كەلۋىنە جانە سۋ تاسقىنى قاۋپىنىڭ ارتۋىنا ىقپال ەتەدى، - دەدى ەرلان نىسانبايەۆ.
ءمينيستردىڭ سوزىنشە، تاسقىن قاۋىپى جوعارى ايماقتار مىنالار: اقتوبە، قوستاناي، ۇلىتاۋ، اباي، قاراعاندى، اقمولا، سولتۇستىك قازاقستان جانە شىعىس قازاقستان وبلىستارى.
قاۋىپتىلىگى ورتاشا ايماقتار: الماتى، جەتىسۋ، جامبىل، باتىس قازاقستان جانە اتىراۋ وبلىستارى.
قاۋىپتىلىگى تومەن ايماقتار: پاۆلودار، ماڭعىستاۋ، تۇركىستان جانە قىزىلوردا وبلىستارى.
وسىعان دەيىن پرەمەر-مينيستر ولجاس بەكتەنوۆتىڭ ۇكىمەت وتىرىسىندا مەملەكەتتىك ورگاندارعا تاسقىنعا دايىندىقتى كۇشەيتۋدى تاپسىرعانى تۋرالى جازدىق.
