سەيسميكالىق قاۋىپتى ايماقتاردا قۇرىلىس سالۋ تالاپتارى وزگەرەدى

استانا. KAZINFORM - سەيسميكالىق قاۋىپتى ايماقتاردا قۇرىلىس جۇمىستارىن جۇرگىزۋ تۋرالى زاڭناماعا جاڭا تالاپتار ەنگىزىلىپ جاتىر. بۇل تۋرالى پرەمەر-مينيستر ولجاس بەكتەنوۆ ءمالىم ەتتى.

«ارنايى قورعاۋعا الىنعان ايماقتار مەن سەيسميكالىق قاۋىپتى اۋدانداردا تۇرعىن ءۇي سالۋ ماسەلەسىنە جەكە توقتالعىم كەلەدى. بۇل ماسەلە اسىرەسە الماتى قالاسىندا وزەكتى. بىلتىر وندا 150-دەن استام قۇرىلىس نورماسىن بۇزۋ فاكتىلەرى انىقتالدى. اتاپ ايتقاندا، تاۋلى جەرلەردە، سۋ وبەكتىلەرىنىڭ بويىندا جانە ەرەكشە قورعالاتىن اۋماقتاردا قۇرىلىس سالىنعان. جاڭا قۇرىلىس جۇمىستارىنا قاتىستى اسىرەسە سەيسميكالىق ايماقتاردا باقىلاۋدى كۇشەيتۋ ماسەلەسى بىرنەشە رەت تالقىلاندى»، - دەدى ولجاس بەكتەنوۆ ۇكىمەت وتىرىسىندا.

ۇكىمەت باسشىسى ءتيىستى تالاپتار زاڭناماعا ەنگىزىلىپ جاتقانىن ايتا كەلە، ونى قاتاڭ ساقتاۋ كەرەكتىگىن تىلگە تيەك ەتتى.

ايتا كەتسەك، و. بەكتەنوۆتىڭ تاپسىرماسىمەن بيىل 1-ماۋسىمعا دەيىن قۇرىلىس وبەكتىلەرىنە رەۆيزيا جۇرگىزىلەدى.

سونداي-اق، پرەمەر- مينيستر استانادا G- Park كومپانياسىنىڭ رەسمي قۇجاتسىز تۇرعىن ۇيلەر سالىپ جاتقانىن ايتقان ەدى.

اۆتور

داۋلەت ىزتىلەۋ