سيريانىڭ ەجەلگى قالاسىندا ەڭ كونە ءالىپبي تابىلدى
استانا. KAZINFORM - سيريانىڭ ەجەلگى قالاسىندا ەڭ كونە ءالىپبي تابىلدى. بۇل جايىندا دجون حوپكينس ۋنيۆەرسيتەتىنەن ءمالىم ەتتى.
ارحەولوگتار سيريانىڭ ەجەلگى قالاسى ۋمم-ەل-ماررەدە ەرتە قولا داۋىرىنە جاتاتىن قابىر تاپقان. بارىنشا جاقسى ساقتالعان قابىرلەردىڭ بىرىندە التى قاڭقا، التىن جانە كۇمىس زەرگەرلىك بۇيىمدار، اس ءۇي ىدىستارى، نايزا ۇشى جانە ءبۇتىن كەراميكالىق ىدىستار بولعان. زەرتتەۋشىلەر قىش ىدىستاردىڭ جانىنان الىپبيگە ۇقسايتىن ازداپ كۇيدىرىلگەن ءتورت ساز تسيليندردى انىقتاعان.
«ءالىپبي جازۋ جازۋدا توڭكەرىس جاساپ، ونى كورولدىك وتباسى مەن الەۋمەتتىك ەليتادان تىس ادامدارعا دا قولجەتىمدى ەتە ءتۇستى. ءالىپبي ادامداردىڭ ءومىر سالتىن، ولاردىڭ ويلاۋى مەن قارىم- قاتىناسىن وزگەرتتى. بۇل تىڭ جاڭالىق ادامداردىڭ جاڭا كوممۋنيكاتسيالىق تەحنولوگيالارمەن ءبىز ويلاعاننان الدەقايدا ەرتەرەك جانە باسقا جەردە تاجىريبە جاساعانىن كورسەتەدى»، - دەدى دجون حوپكينس ۋنيۆەرسيتەتىنىڭ ارحەولوگيا پروفەسسورى گلەنن شۆارتس.
الدىن الا بولجامعا سايكەس، جاڭا تابىلعان ءالىپبي ءبىزدىڭ زامانىمىزعا دەيىن شامامەن 2400 جىل بۇرىن قولدانىستا بولعان. دەمەك، ول بىزگە ءمالىم الىپبيلەردەن 500 جىل شاماسىندا بۇرىن قولدانىلعان.
«بۇعان دەيىن عالىمدار ءالىپبيدىڭ مىسىردا نەمەسە سوعان تاقاۋ ماڭدا ءبىزدىڭ زامانىمىزعا دەيىنگى 1900-جىلدان كەيىن پايدا بولدى دەپ ساناپ كەلگەن ەدى»، - دەدى گلەنن شۆارتس.
