سيرياداعى ا ق ش بازاسىنا شابۋىل جاسالدى
استانا. KAZINFORM - سيريانىڭ سولتۇستىك-شىعىسىنداعى كاسرەك ايماعىنداعى امەريكالىق اسكەري بازا مينااتار شابۋىلىنا ۇشىرادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
Mehr اقپارات اگەنتتىگى مەن يراكتىڭ Al-Maalomah رەسۋرسىنىڭ حابارلاۋىنشا، دۇيسەنبى كۇنى تاڭەرتەڭ حاساكا پروۆينسياسىنىڭ باتىس بولىگىندە ورنالاسقان ا ق ش بازاسىنا مينااتاردان شابۋىل جاسالعان. الدىن الا مالىمەت بويىنشا، سوققى بەلگىسىز باعىتتان جاسالعان.
وسىدان كەيىن امەريكالىق كۇشتەر دايىندىقتىڭ جوعارى دەڭگەيىنە كوشتى. دەرەككوزدەر شابۋىلدان كەيىن، اسىرەسە بازانىڭ اينالاسىنداعى شىعىس جانە سولتۇستىك سەكتورلاردا اۋقىمدى وپەراتسيالار باستالعانىن راستايدى. سونىمەن قاتار نىساننىڭ نەگىزگى تاسىلدەرىنە قاتاڭ قاۋىپسىزدىك شارالارى ەنگىزىلدى.
ايماق اسپانىنان Apache تىكۇشاقتارى بايقالدى، بۇل امەريكالىق اسكەري كونتينگەنتتىڭ الاڭداۋشىلىعىن كورسەتەدى.
امەريكا بيلىگى بۇل وقيعاعا قاتىستى ازىرگە رەسمي مالىمدەمە جاساعان جوق.
كاسرەك بازاسى - 2025 -جىلدىڭ ماۋسىمىندا سيرياداعى امەريكانىڭ اسكەري قاتىسۋىن قىسقارتقاننان كەيىن ا ق ش باقىلاۋىندا قالعان ساناۋلى نىسانداردىڭ ءبىرى. شاددادي جانە ومارداعى بازالارمەن بىرگە بۇل بازا كواليتسيانىڭ وپەراتسياسى اياسىندا اتىس جانە لوگيستيكالىق قولداۋ كورسەتۋدى جالعاستىرىپ كەلەدى.
ا ق ش- تىڭ يرانداعى نىساندارعا جاساعان اۋە شابۋىلدارىنان ايماقتاعى جاعدايدىڭ شيەلەنىسۋى تۇسىندا امەريكانىڭ اسكەري جانە بارلاۋ قىزمەتتەرى تاياۋ شىعىستاعى يرانشىل قۇرىلىمداردىڭ شابۋىلدارىنا دايىندىق بەلگىلەرىن تىركەپ جاتىر. The New York Times ۆاشينگتونداعى رەسمي دەرەككوزدەرگە سىلتەمە جاساپ حابارلاعانداي، يراك پەن سيرياداعى ا ق ش بازالارىنا سوققى جاسالۋى مۇمكىن.
اۆتور
ەركەجان سماعۇلوۆا
