سيريادا ەتنيكالىق قاقتىعىستاردىڭ سالدارىنان 30 ادام مەرت بولدى

استانا. KAZINFORM - ەس-سۋۆەيدادا قارۋلى اراب تايپالارى مەن تاۋلىق درۋزداردىڭ قورعانىس كۇشتەرىنىڭ اراسىنداعى قارۋلى قاقتىعىس سالدارىنان 30 ادام مەرت بولىپ، 100 دەن استام ادام جاراقات الدى. بۇل تۋرالى اراب مەملەكەتى وتپەلى ۇكىمەتى ىشكى ىستەر مينيسترلىگىنىڭ Al Watan باسىمىلىندا جاريالانعان مالىمدەمەسىندە ايتىلعان، دەپ جازادى رەسەيلىك ت ا س س.

وسىعان دەيىن 13 ادامنىڭ مەرت بولىپ، 40 ادام جاراقات العانى تۋرالى حابارلانعان.

- زورلىق-زومبىلىقتىڭ ءورشۋى وڭىردەگى قاۋىپسىزدىك باعىتىنداعى جۇمىستاردىڭ بەي-بەرەكەتتىگى مەن جەرگىلىكتى اكىمشىلىكتىڭ پروبلەمالاردى رەتتەي الماۋىنىڭ ناتيجەسى بولدى، - دەلىنگەن حابارلامادا.

- وسى سەبەپتى سيريا بيلىگى ەلدىڭ وڭتۇستىگىنە جاعدايدى تۇراقتاندىرۋ ءۇشىن قاۋىپسىزدىك كۇشتەرىنىڭ ارنايى بولىمشەلەرىن جىبەردى. سيريانىڭ ىشكى ىستەر مينيسترلىگى ەس-سۋۆەيدا حالقىن قاقتىعىستى تەز ارادا توقتاتۋ، زاڭدىلىق پەن ءتارتىپتى قالپىنا كەلتىرۋ ءۇشىن بيلىكپەن ىنتىماقتاسۋعا شاقىردى.

بۇعان دەيىن درۋز قوعامداستىعىنىڭ شەيحتەرى ەكى بالا قازا بولعان شابۋىلداردى ايىپتاپ، بەيبىتشىلىكتى ساقتاۋ ءۇشىن اتىستى توقتاتۋدى تالاپ ەتتى. Al Mayadeen تەلەارناسى تاراتقان مالىمدەمەدە ولار سيريانىڭ ۋاقىتشا ۇكىمەتى قارۋلانعان باندىلاردىڭ شابۋىلدارىن توقتاتىپ، داماسك - ەس-سۋۆەيدا تاس جولىنداعى قاۋىپسىزدىكتى قامتاماسىز ەتۋى كەرەك ەكەنىن حابارلادى.

درۋزدار - سيريا، ليۆان، يزرايل جانە يوردانيادا تۇراتىن، اراب تىلىندە سويلەيتىن، وقشاۋلانعان ەتنوكونفەسسيالىق توپ. سيريادا 700 مىڭعا جۋىق درۋز بار، بۇل - سانى جاعىنان كۇردتەر مەن الاۆيتتەردەن كەيىنگى ءۇشىنشى ءدىني-ەتنيكالىق ازشىلىق. 1-مامىردا دجارامانە مەن ساحنادا درۋزدار تۇراتىن ايماقتاردا اتىستى توقتاتۋ جونىندە كەلىسىم جاسالدى. قاقتىعىستار بارىسىندا قاۋىپسىزدىك كۇشتەرىنىڭ 20 قىزمەتكەرى قازا تاپتى.

وسىعان دەيىن ا ق ش- تىڭ سيرياعا قارسى سانكسيالاردى توقتاتاتىنى تۋرالى جازدىق.