سىرتقى ىستەر مينيسترلىگىنەن 11 فۋنكسيا الىنىپ تاستالدى

استانا. KAZINFORM - بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ديپلوماتيالىق قىزمەت، حالىقارالىق شارتتار جانە دامۋعا رەسمي كومەك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ماقۇلداندى.

زاڭ حالىقارالىق قاتىناستار سالاسىنداعى زاڭنامانى جانە ديپلوماتيالىق قىزمەتتى جەتىلدىرۋگە باعىتتالعان.

- مەملەكەت باسشىسىنىڭ «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» جارلىعىن ىسكە اسىرۋ ماقساتىندا ازىرلەنگەن زاڭ بويىنشا ءبىرقاتار زاڭدارعا وزگەرىس ەنگىزىلدى. اتاپ ايتقاندا، «قازاقستان رەسپۋبليكاسىنىڭ ديپلوماتيالىق قىزمەتى تۋرالى» زاڭىنان مينيسترلىكتىڭ (س ءى م) 11 فۋنكسياسى، 4 ارتىق ناقتىلانعان نورما، «دامۋعا رەسمي كومەك تۋرالى» زاڭىنان 6 فۋنكسياسى الىنىپ تاستالدى، «قازاقستان رەسپۋبليكاسىنىڭ حالىقارالىق شارتتارى تۋرالى» زاڭىنا قۇقىقتىق ولقىلىقتى جويۋ ماقساتىندا رەداكسيالىق تۇزەتۋ ەنگىزىلدى. بۇلار قازىرگى ۋاقىتتا سىرتقى ىستەر مينيسترلىگى تۋرالى ەرەجەدە جانە باسقا دا زاڭعا تاۋەلدى نورماتيۆتىك- قۇقىقتىق اكتىلەردە قاراستىرىلعان، - دەدى سەناتور دارحان قىدىرالى.

زاڭدا سىرتقى ىستەر مينيسترلىگى قىزمەتىنىڭ ەرەكشەلىگىن ەسكەرە وتىرىپ، ديپلوماتيالىق قىزمەت ارداگەرلەرىنە بۇرىن حالىقارالىق ۇيىمداردا قىزمەت اتقارعان ازاماتتاردى تەڭەستىرۋ كوزدەلگەن. سونىمەن قاتار ديپلوماتيالىق كورپۋستىڭ بىلىكتىلىگىن ارتتىرۋعا جانە ءوزىن- ءوزى جەتىلدىرۋگە ىنتالاندىراتىن ديپلوماتيالىق قىزمەتشىلەردىڭ شەت تىلدەرىن بىلگەنى ءۇشىن تولەمدەرى وزگەرتىلدى.

- حالىقارالىق شارتتاردى باسقارۋدىڭ ەلەكتروندىق جۇيەسى ەنگىزىلدى. سونىڭ ەسەبىنەن قازاقستان رەسپۋبليكاسىنىڭ حالىقارالىق شارتتاردى جاساسۋدى جوسپارلاۋ الىنىپ تاستالدى. ءوز كەزەگىندە بۇل پروتسەستى وڭتايلاندىرادى. مۇنىمەن قوسا، ۇكىمەتكە قازاقستان رەسپۋبليكاسىنان تىس جەرلەردە ورنالاسقان ديپلوماتيالىق قىزمەت ورگاندارىنا بەكىتىلگەن مەملەكەتتىك مۇلىكتى يەلىكتەن شىعارۋ ءتارتىبىن بەكىتۋ بويىنشا قۇزىرەت بەرىلدى. وسى وزگەرىس ۇكىمەتكە مەملەكەتتىك مۇلىك جونىندەگى ۋاكىلەتتى ورگانمەن قاتار، سىرتقى ىستەر مينيسترلىگىن وسىنداي يەلىكتەن شىعارۋدى جۇزەگە اسىراتىن ورگان رەتىندە ايقىنداۋعا مۇمكىندىك بەرەدى،- دەدى دەپۋتات.

بۇدان بۇرىن حابارلانعانداي، بۇگىن سەناتتىڭ جالپى وتىرىسىندا يرانمەن ساۋدانى جاڭا دەڭگەيگە شىعارۋعا ارنالعان زاڭ ماقۇلداندى.