سىرتقى ىستەر ءمينيسترى يزرايل-حاماس قاقتىعىسىنداعى قازاقستان ۇستانىمىن ايتتى

گازا حالقى ءۇشىن گۋمانيتارلىق دالىزدەردى اشۋ - قازاقستاندىق ديپلوماتيانىڭ ءبىرىنشى كەزەكتەگى مىندەتى بولىپ وتىر. بۇل تۋرالى ق ر سىرتقى ىستەر ءمينيسترى مۇرات نۇرتىلەۋ ءمالىم ەتتى، دەپ حابارلايدى Kazinform اگەنتتىگى.

«ەلدەرىمىز بەن حالىقتارىمىزدىڭ تۇراقتىلىعى مەن وركەندەۋىن قامتاماسىز ەتكىمىز كەلسە، قازىرگى گەوساياسي تۋربۋلەنتتىلىك پەن ەكونوميكالىق سىن- قاتەر بىزدەن ت م ۇ شەڭبەرىندە كەلىسىلگەن كۇش- جىگەردى تالاپ ەتەدى. سوندىقتان ەلىمىز تاياۋ شىعىستاعى زورلىق-زومبىلىقتىڭ ۋشىعۋىنا قاتتى الاڭدايدى. ءبىز حالىقارالىق قاۋىمداستىقپەن ىنتىماقتاستىققا قوسىلامىز جانە يزرايل مەن حاماس اراسىنداعى اتىستى دەرەۋ توقتاتۋعا شاقىرامىز»، - دەدى م. نۇرتىلەۋ تۇركى مەملەكەتتەرى ۇيىمى سىرتقى ىستەر مينيسترلەرى كەڭەسىنىڭ وتىرىسىندا.

ءمينيستردىڭ ايتۋىنشا، گازا حالقى ءۇشىن گۋمانيتارلىق ءدالىز اشۋ - قازاقستاندىق ديپلوماتيانىڭ ءبىرىنشى كەزەكتەگى مىندەتى، ول قانداي دا ءبىر الدىن الا شارتسىز ورىندالۋعا ءتيىس.

«قاقتىعىس تاراپتارى تاياۋ شىعىستا عانا ەمەس، بۇكىل الەمدەگى تۇراقتىلىق پەن قاۋىپسىزدىك ءۇشىن بەيبىت كەلىسسوزگە نازار اۋدارىپ، ب ۇ ۇ-نىڭ ءتيىستى قارارلارىنا سايكەس «ەكى حالىق ءۇشىن ەكى مەملەكەت» فورمۋلاسىن قولداۋى كەرەك. شىنىندا دا، قازىرگى جاعداي بۇرىن-سوڭدى بولماعان جانە ونى ەش بولجاۋ مۇمكىن ەمەس. وسىعان قاراماستان قازاقستان ب ۇ ۇ جارعىسىندا جانە حالىقارالىق قۇقىقتا بەكىتىلگەن قۇندىلىقتار مەن قاعيداتتاردى بەرىك ۇستانىپ، تەڭگەرىمدى، كوپۆەكتورلى سىرتقى ساياساتتى جۇرگىزۋدى جالعاستىرا بەرەدى»، - دەدى مۇرات نۇرتىلەۋ.

ايتا كەتەيىك، استانادا تۇركى مەملەكەتتەرىنىڭ سىرتقى ىستەر مينيسترلەرى باس قوستى. وتىرىس جابىق فورماتتا وتۋدە.

بۇگىن ەلوردادا تۇركى مەملەكەتتەرى ۇيىمىنىڭ (ت م ۇ) مەرەيتويلىق X سامميتى وتەدى.

بۇل جيىنعا تۇركى مەملەكەتتەرى ۇيىمىنا مۇشە ازەربايجان، قىرعىزستان، تۇركيا، وزبەكستان پرەزيدەنتتەرى، سونداي- اق ت م ۇ- داعى باقىلاۋشى مەملەكەتتەر - ماجارستان مەن تۇرىكمەنستان باسشىلارى قاتىسادى.

سامميت «تۇركى ءداۋىرى» ۇرانىمەن وتەتىن جوعارى دەڭگەيدەگى پىكىرتالاستار ءۇشىن ماڭىزدى الاڭ بولادى.