ەسىرتكى قىلمىسىنا قاتىستى لاۋازىم يەسى ءومىر بويىنا سوتتالۋى مۇمكىن
استانا. KAZINFORM - ەسىرتكى قىلمىسىنا قاتىستىلىعى دالەلدەنگەن لاۋازىمدى تۇلعا ءومىر بويى باس بوستاندىعىنان ايىرىلۋى مۇمكىن. بۇل جايىندا ءماجىلىس دەپۋتاتى اسحات ايماعامبەتوۆ Facebook پاراقشاسىندا جازدى.
«ماجىلىستە ەسىرتكى وندىرۋشىلەرىنە جازانى كۇشەيتۋگە باعىتتالعان ماڭىزدى زاڭ جوباسى تالقىلانۋدا. جازانى ءومىر بويىنا باس بوستاندىعىنان ايىرۋعا دەيىن قاتايتۋ ۇسىنىلدى. بۇل - ادىلەتتى شەشىم. دەپۋتاتتار وسى نورمانى قولداپ داۋىس بەردى. الايدا، بۇدان دا كۇردەلى ماسەلە بار. قىلمىسپەن كۇرەسۋى ءتيىس ازاماتتاردىڭ وزدەرى ەسىرتكى بيزنەسىنە ارالاسقان كەزدە نە بولادى؟ ءبىز قۇقىق قورعاۋ ورگاندارىنىڭ قىزمەتكەرلەرى مەن وزدەرىنىڭ لاۋازىمىن، قىزمەتتىك مۇمكىندىكتەرىن جانە اقپاراتقا قولجەتىمدىلىكتى پايدالانىپ، ەسىرتكى اينالىمىنا قاتىسقان وزگە دە لاۋازىمدى تۇلعالارعا ءومىر بويىنا باس بوستاندىعىنان ايىرۋ جازاسىن ەنگىزۋ تۋرالى ۇسىنىس جاسادىق»، - دەدى اسحات ايماعامبەتوۆ.
ونىڭ اتاپ وتۋىنشە، ەگەر ولاردىڭ كىناسى دالەلدەنسە، مۇنداي ارەكەتتەر ەڭ قاتاڭ جازالانۋى ءتيىس. سەبەبى بۇل - ازاماتتاردىڭ مۇددەسىنە جاسالعان ساتقىندىق، قوعام سەنىمىنە نۇقسان كەلتىرىپ، ەلدىڭ قاۋىپسىزدىگىنە قاتەر توندىرەدى.
«مەملەكەت باسشىلىعى ەسىرتكى بيزنەسىمەن جانە ونىڭ تارالۋىمەن كۇرەستى ىمىراسىز جانە جۇيەلى تۇردە جۇرگىزۋدە. قوعام ءۇشىن ۇلكەن ءقاۋىپ ءتوندىرىپ وتىرعان وسى ماسەلەنى جويۋعا باعىتتالعان ەسىرتكىگە تاۋەلدىلىكپەن كۇرەس جونىندەگى كەشەندى جوسپار بەكىتىلدى. سونىمەن قاتار، ۇلتتىق قاۋىپسىزدىكتى نىعايتاتىن قوسىمشا شارالار دا قابىلدانۋدا»، - دەدى ءماجىلىس دەپۋتاتى.
