ەسىرتكى كارتەلىنە تيەسىلى جەراستى تۋننەلى تابىلدى
استانا. KAZINFORM - يسپانيا پوليتسياسى ماروككو مەن سولتۇستىك افريكانى بايلانىستىراتىن كۇردەلى جەراستى تۋننەلدەر جەلىسىن انىقتادى. وندا 17 توننادان استام گاشيش، 88 كەلى كوكاين، شامامەن 1,4 ميلليون ەۋرو جانە بىرنەشە قىمبات كولىك تاركىلەندى، دەپ حابارلايدى DW.
وتكەلدەر 19 مەتر تەرەڭدىكتە ورنالاسقان، ال يسپانيا اۋماعىنداعى كىرەبەرىس مۇقيات جاسىرىلعان، وعان ءوتۋ ءۇشىن ۇيدەگى توڭازىتقىشتى جىلجىتۋ قاجەت. قۇقىق قورعاۋ ورگاندارى تابىلعان قۇرىلىمدى كوپ دەڭگەيلى «لابيرينت» دەپ سيپاتتادى.
ەسىرتكىنى جەراستى ارقىلى تاسىمالداۋ ءۇشىن ۆاگونەتكالار، رەلستەر جانە كوتەرۋ مەحانيزمدەرى قولدانىلعان.
تۋننەل ءۇش دەڭگەيلى كۇردەلى قۇرىلىمنان تۇرادى. وعان ءوتۋ ءۇشىن جەردىڭ استىنا تىك ءتۇسىپ، ەسىرتكى جينالىپ، تاراتىلاتىن ارالىق كامەرا ارقىلى ماروككوعا اپاراتىن نەگىزگى وتكەلگە جەتەدى. بارلىق ينفراقۇرىلىم كوتەرۋ مەحانيزمى جۇيەسىمەن جانە جەراستى سۋلارىن سورۋعا ارنالعان سورعىلارمەن جابدىقتالعان.
وپەراتسياعا 250 گە جۋىق پوليتسيا قىزمەتكەرى قاتىستى. ناتيجەسىندە 27 ادام ۇستالىپ، 17 توننادان استام گاشيش پەن 88 كەلى كوكاين تاركىلەندى. سونداي-اق شامامەن 1,4 ميلليون ەۋرو قولما-قول اقشا الىندى. سونىمەن قاتار، ونداعان بايلانىس قۇرالدارى مەن بىرنەشە پرەميۋم كولىكتەر تاركىلەندى.
تەرگەۋ 2025 -جىلدىڭ اقپان ايىندا باستالىپ، بىرنەشە كەزەڭنەن وتكەنى اتاپ ءوتىلدى. تەرگەۋ مالىمەتتەرى بويىنشا قىلمىستىق توپتى ەكى ادام باسقارعان.
ماروككودا ۇستالعان ولاردىڭ ءبىرى «ەسىرتكى ساۋلەتشىسى» جانە «تۋننەل شەبەرى» دەگەن لاقاپ اتقا يە بولعان. ول جەراستى مارشرۋتتارىن جاسادى دەپ كۇدىككە ءىلىندى. ەكىنشىسى سەۋتادا جۇمىس ىستەپ، سوندا جەتكىزىلىمدەردى ۇيلەستىرىپ، مامىلەلەر جاساعان. تەرگەۋشىلەر ەسىرتكىنىڭ تاركىلەنگەن پارتياسى ەكىنشى كۇدىكتىگە تيەسىلى دەپ سانايدى.
ايتا كەتەيىك، بۇعان دەيىن ۇلىتاۋ وبلىسىندا ءىرى ەسىرتكى جەتكىزۋ ارناسى جويىلعانى تۋرالى جازعان بولاتىنبىز.
