سۋىق قارۋدىڭ زاڭسىز اينالىمىنا قارسى كۇرەس كۇشەيتىلدى

استانا. KAZINFORM - كۇدىكتىلەر تىيىم سالىنعان زاتتاردى ينتەرنەت-دۇكەندەر ارقىلى ساتىپ العان. بۇل تۋرالى باس كولىك پروكۋراتۋراسى حابارلادى.

باس كولىك پروكۋراتۋراسى سۋىق قارۋدىڭ، ونىڭ ىشىندە كاستەتتەردىڭ زاڭسىز اينالىمىنا بايلانىستى قىلمىستىڭ (ق ك- ءنىڭ 287-بابى) الدىن الۋ بويىنشا كەشەندى شارالار جۇرگىزىپ جاتىر.

تەرگەۋ امالدارى كورسەتكەندەي، كۇدىكتىلەر تىيىم سالىنعان زاتتاردى ينتەرنەت-دۇكەندەر ارقىلى ساتىپ العان.

- مادەنيەت جانە اقپارات مينيسترلىگىنىڭ اقپارات كوميتەتىمەن بىرلەسە وتىرىپ، «Satu.kz» ماركەتپلەيسىنىڭ سۋىق قارۋ جارناماسىن ورنالاستىرعانى انىقتالىپ، ول ا ق ب ت ك- ءنىڭ 455-بابى بويىنشا اكىمشىلىك جاۋاپتىلىققا تارتىلدى. ينتەرنەت-الاڭدار ءۇشىن مۇنداي جارنامانى ورنالاستىرعانى ءۇشىن اكىمشىلىك جاۋاپتىلىق قاراستىرىلعان، سونداي-اق تىيىم سالىنعان كونتەنتتى بۇعاتتاۋ شارالارى قابىلدانىپ جاتىر، - دەلىنگەن حابارلامادا.

كولىك نىساندارىندا - اۋەجايلار مەن تەمىرجول ۆوكزالدارىندا - قىلمىستىق جاۋاپتىلىق تۋرالى پلاكاتتار مەن باننەرلەر ورنالاستىرىلىپ، تىيىم سالىنعان زاتتاردى ءوز ەركىمەن تاپسىرۋعا ارنالعان جاشىكتەر ورناتىلعان.

باس كولىك پروكۋراتۋراسى ازاماتتارعا ەسكەرتەدى: سۋىق قارۋدى زاڭسىز يەمدەنۋ، بەرۋ، وتكىزۋ، ساقتاۋ، تاسىمالداۋ نەمەسە الىپ ءجۇرۋ قىلمىستىق جاۋاپتىلىققا، ال جارنامانى ورنالاستىرۋ اكىمشىلىك جاۋاپتىلىققا اكەپ سوعادى. سۋىق قارۋدى (سونىڭ ىشىندە كاستەتتى) ءوز ەركىمەن تاپسىرعان ادام قىلمىستىق جاۋاپتىلىقتان بوساتىلادى.

ۇشۋ نەمەسە جولعا شىعۋ الدىندا جۇك پەن جەكە زاتتاردى مۇقيات تەكسەرۋ ۇسىنىلادى.

ايتا كەتەلىك بيىل 118 قارۋ مەن 15 گراناتا تاركىلەندى.