سىنىپ جەتەكشىلەرىنىڭ ايلىعىنا ءۇش ەسە ۇستەماقى قاشان قوسىلادى - ءمينيستردىڭ جاۋابى
اسانا. قازاقپارات - مەكتەپتە سىنىپ جەتەكشىلەرىنە 3 ەسە كوپ ۇستەماقى قاشان قوسىلادى؟ Ulysmedia.kz ءتىلشىسى وقۋ-اعارتۋ ءمينيسترى عاني بەيسەمبايەۆكە رەسمي ساۋال ارقىلى وسى سۇراقتى قويىپ كوردى.
ءتىلشى وقۋ-اعارتۋ ءمينيسترى عاني بەيسەمبايەۆقا سىنىپ جەتەكشىلەرىنە قوسىلاتىن ۇستەماقى تۋرالى ساۋال جولداعان.
- جاقىندا جيىنداردىڭ بىرىندە ءسىزدىڭ «سىنىپ جەتەكشىلەرىنىڭ ۇستەماقىسى ءۇش ەسە كوتەرىلەدى» دەپ ايتقان ۆيدەوڭىز تارادى. ونىڭ الدىندا بۇل ماسەلە قارجى مينيسترلىگىمەن بىرگە شەشىلەتىنىن ءمالىم ەتكەن ەدىڭىز. سىنىپ جەتەكشىلەرىنە ءۇش ەسەلىك ۇستەماقى قاشاننان باستاپ قوسىلادى؟ بۇل ماقساتتا بيۋدجەتتەن قانشا اقشا كەرەك؟ مينيسترلىكتىڭ ەسەبى بار ما؟ قارجى مينيسترلىگىنە وسى جونىندە ۇسىنىس (بيۋدجەتتىك ءوتىنىم) جولداندى ما؟ قازاقستاندا قانشا سىنىپ جەتەكشىسىنىڭ ايلىعىنا ۇستەماقى قوسىلادى؟ - دەپ سۇرالدى مينيستردەن.
جاۋاپ
عاني بەيسەمبايەۆتىڭ جاۋابى تولىققاندى بولمادى. اتاپ ايتقاندا، بۇل باعىتتا قانشا قاراجات كەرەكتىگىن مينيسترلىك ناقتى اتامادى.
- قولدانىستاعى ازاماتتىق قىزمەتشىلەرگە ەڭبەكاقى تولەۋ جۇيەسىمەن (بۇدان ءارى- ەڭبەكاقى تولەۋ جۇيەسى) سىنىپ جەتەكشىلىگى (توپ جەتەكشىلىگى) ءۇشىن بازالىق لاۋازىمدىق ايلىق اقىدان (بۇدان ءارى- ب ل ا) %50 جانە %60 مولشەرىندە (1-4-سىنىپتار ءۇشىن ب ل ا- دان %50، 5-11-سىنىپتار ءۇشىن ب ل ا-دان %60، تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋ ۇيىمدارىندا ب ل ا-دان %50 مولشەرىندە) قوسىمشا اقى قاراستىرىلعان. قازىرگى ۋاقىتتا پەداگوگتەرگە سىنىپ جەتەكشىلىگى (توپ جەتەكشىلىگى) ءۇشىن ەڭبەكاقى تولەۋ جۇيەسىمەن بەلگىلەنگەن قوسىمشا اقىنىڭ قولدانىستاعى مولشەرىن ۇلعايتۋ ماسەلەسى پىسىقتالۋدا. ءوز كەزەگىندە مينيسترلىك ۇسىنىلعان باستاماعا بيۋدجەت قاراجاتىنىڭ قوسىمشا قاجەتتىلىگىن ايقىنداپ، بيۋدجەتتىك جوسپارلاۋ جونىندەگى ۋاكىلەتتى ورگانعا زاڭنامادا بەلگىلەنگەن تارتىپتە ۇسىنىستار ەنگىزۋدى جوسپارلاپ وتىر. سىنىپ جەتەكشىلىگى (توپ جەتەكشىلىگى) ءۇشىن بەلگىلەنگەن قوسىمشا اقىنىڭ قولدانىستاعى مولشەرىن 3 ەسەگە ۇلعايتۋ ماسەلەسى ازىرشە تالقىلانۋدا، - دەلىنگەن جاۋاپتا.
قازىرگى ۋاقىتتا قازاقستاندا سىنىپ جەتەكشىلىگى ءۇشىن مۇعالىمدەردىڭ تەك 10 مىڭ تەڭگە ۇستەماقى قوسىلادى.
