سينگاپۋر الەمدەگى ەڭ قاۋىپسىز ەل اتاندى

استانا. KAZINFORM - سينگاپۋر 2006-جىلدان بەرى 12-رەت جاھاندىق قاۋىپسىزدىك رەيتينگىندە I ورىندى يەلەندى، دەپ حابارلايدى شينحۋا.

بۇل تۋرالى بەيسەنبى كۇنى جاريالانعان گەللاپ ينستيتۋتىنىڭ جاھاندىق قاۋىپسىزدىك ەسەبىندە كورسەتىلگەن.

2024 -جىلى سينگاپۋرلىقتاردىڭ 98 پايىزى تۇندە جالعىز سەرۋەندەگەن كەزدە وزدەرىن قاۋىپسىز سەزىنەتىندەرىن ايتقان. بۇل - گەللاپ ينستيتۋتى تىركەگەن الەمدەگى ەڭ جوعارى كورسەتكىشتەردىڭ ءبىرى. ەسەپتە سينگاپۋر تۇرعىندارىنىڭ قاۋىپسىزدىك سەزىمى بويىنشا تۇراقتى جوعارى دەڭگەي ساقتالىپ كەلە جاتقانى اتاپ وتىلگەن.

ساۋالناما ناتيجەسىندە ەرلەر مەن ايەلدەردىڭ قاۋىپسىزدىك سەزىمى بىردەي دەڭگەيدە ەكەنى بايقالدى: 2024 -جىلى ەر ازاماتتاردىڭ 98 پايىزى، ال ايەلدەردىڭ 97 پايىزى وزدەرىن قاۋىپسىز سەزىنگەن.

ەسەپتە بۇل كورسەتكىشتەر قىلمىستىڭ تومەن دەڭگەيىمەن، قۇقىق قورعاۋ ورگاندارىنىڭ ءتيىمدى جۇمىسىمەن جانە قوعامدىق ءتارتىپتىڭ جوعارى بولۋىمەن تۇسىندىرىلەدى.

بۇدان بۇرىن Julius Baer بانكىنىڭ 2025 -جىلعى بايلىق پەن ءومىر سالتى تۋرالى بايانداماسىنا سايكەس، سينگاپۋر ءۇشىنشى جىل قاتارىنان ءال- اۋقاتتىلار ءۇشىن ءومىر ءسۇرۋ قۇنى ەڭ قىمبات قالا رەتىندە تانىلدى.

ايتا كەتەيىك، بىلتىر سەنات سينگاپۋرمەن اراداعى الىس-بەرىستىڭ باج سالىعىن جەڭىلدەتەتىن زاڭدى ماقۇلدادى.