ەسىن بىلەدى، ەم الىپ جاتىر - مينيسترلىك سەمەيدە جاراقات العان مۇعالىمنىڭ جاي-كۇيىن ايتتى

استانا. KAZINFORM - دەنساۋلىق ساقتاۋ مينيسترلىگى مەديتسينالىق كومەك كورسەتۋ دەپارتامەنتىنىڭ ديرەكتورى گۇلنار سارسەنبايەۆا سەمەيدە شىرشا بەزەندىرۋ كەزىندە جاراقات العان ءمۇعالىمنىڭ جاي-كۇيى تۋرالى ايتىپ بەردى.

- ناۋقاستىڭ جاعدايى جاقسارىپ كەلەدى. قازىر ول ەسىن بىلەدى، مەديتسينالىق كومەك الىپ جاتىر. جاراقات العان كۇنى وعان شۇعىل وتا جاسالدى. قازىر ول جانساقتاۋ بولىمىنەن شىعارىلدى جانە ىسىنۋگە قارسى ەم جۇرگىزىلۋدە، - دەدى گ. سارسەنبايەۆا ءماجىلىس كۋلۋارىندا.

«مۇعالىم قالىپتى ومىرگە قايتا ورالىپ، ساباق بەرە الا ما؟» دەگەن سۇراققا جاۋابىندا مينيسترلىك وكىلى جاراقاتتىڭ اۋىر ەكەنىن اتاپ ءوتتى.

- ناۋقاس قازىر ەم قابىلدايدى جانە كەيىننەن وڭالتۋعا جىبەرىلەدى. وسىدان كەيىن جاعدايى باعالانادى. مۇعاىمگە باس سۇيەك-مي جاراقاتى دياگنوزى قويىلدى. بۇگىن - وتادان كەيىنگى ءتورتىنشى كۇن. ناۋقاس ەسىن جيدى، بارلىق سۇراقتارعا جاۋاپ بەرۋدە. ءارى قارايعى ديناميكا باقىلاۋدا بولادى. بارلىعى اعزانىڭ ەرەكشەلىكتەرىنە جانە ونىڭ قانشالىقتى تەز قالپىنا كەلەتىنىنە بايلانىستى. ەڭ باستىسى، قازىر ناۋقاس ەسىن بىلەدى جانە قويىلعان سۇراقتارعا جاۋاپ بەرە الادى. جاراقات اۋىر بولعاندىقتان، قالپىنا كەلۋ پروتسەسى ءبىراز ۋاقىتتى قاجەت ەتەدى، - دەدى سپيكەر.

ەسكە سالساق، وسىعان دەيىن سەمەيلىك مۇعالىم شىرشا بەزەندىرۋ كەزىندە جاراقات العانى حابارلانعان.

وقيعاعا بايلانىستى قالا اكىمىنىڭ ورىنباسارى ارايبەك حامزايەۆقا سوگىس جاريالاندى جانە ءبىلىم ءبولىمىنىڭ باسشىسى ءبىرجان بۇلابايەۆ قىزمەتىنەن بوساتىلدى.

اۆتور

ايجان سەرىكجان قىزى