ەسىك كولىندەگى بوگەت 23 ميلليارد تەڭگەگە قالپىنا كەلتىرىلەدى
قونايەۆ. KAZINFORM - الماتى وبلىسىنىڭ قارجى باسقارماسىنىڭ وكىلى Kazinform اگەنتتىگىنە سۋ شارۋاشىلىعى نىسانىن قايتا جاڭعىرتۋ جوسپارلارى تۋرالى ايتىپ بەردى.

باسقارمادان اتاپ وتكەندەي، 2024-جىلى قولدانىستاعى سۋ شارۋاشىلىعى قۇرىلىمدارىن جالعا بەرۋ جانە سەنىمگەرلىكپەن باسقارۋ ەرەجەلەرىنە سايكەس بوگەتتى قالپىنا كەلتىرۋ جۇمىستارىن جۇرگىزۋ ءۇشىن تەندەر ارقىلى 23,6 ميلليارد تەڭگەگە جۋىق جەكە ينۆەستيتسيا تارتىلدى.
- ەسىك كولىندەگى بوگەت قايتا قالپىنا كەلتىرىلەدى. ياعني، گيدروتەحنيكالىق قۇرىلىسقا كوپفاكتورلى زەرتتەۋ جۇرگىزىلىپ، جوبالىق-سمەتالىق قۇجاتتاما (ج س ق) ازىرلەنەدى. الداعى ۋاقىتتا ساراپتاما جاسالىپ، جوبالىق-سمەتالىق قۇجاتتاما بەكىتىلگەننەن كەيىن قۇرىلىس جۇمىستارىن كەزەڭ-كەزەڭىمەن جۇزەگە اسىرۋ باستالادى، - دەپ جاۋاپ بەردى رەداكسيا ساۋالىنا قارجى باسقارماسى باسشىسىنىڭ ورىنباسارى انار اقشولاقوۆا.
ايتۋىنشا، جوبانى ىسكە اسىرۋعا بوگەت قاۋىپسىزدىگى سالاسىنداعى جۇمىستاردى جۇرگىزۋ قۇقىعىنا يە جانە ەرەجە تالاپتارىنا سايكەس كەلەتىن مەردىگەرلەر تارتىلادى.
- ينفراقۇرىلىمدى جاڭعىرتۋ دەمالۋشىلارعا قولايلى جاعداي جاساپ، وڭىرگە جاڭا تۋريستەردى تارتۋعا مۇمكىندىك بەرەدى، - دەپ اتاپ ءوتتى انار اقشولاقوۆا.
ەسكە سالايىق، بىلتىر ساتىپ الۋ قۇقىعىنسىز 49 جىل مەرزىمگە سەنىمگەرلىك باسقارۋعا بەرىلگەن ەسىك كولىندەگى بوگەت الماتى وبلىسىنىڭ كوممۋنالدىق مەنشىككە قايتارىلعان بولاتىن.
ۋچاسكەنىڭ اۋماعى - 141,643 گەكتار.
شارت «قازەلەكتروەنەرگيا» ج ش س- مەن 1 ميلليارد 052 ميلليون تەڭگەگە جاسالعان.