سيفرلىق عاسىر - بايلانىس كوپ، ءبىراق جالعىزدىق تا ارتتى
استانا. KAZINFORM - دۇنيەجۇزىلىك دەنساۋلىق ساقتاۋ ۇيىمىنىڭ الەۋمەتتىك بايلانىستار جونىندەگى كوميسسياسى جاريالاعان جاھاندىق ەسەپتە جالعىزدىق قوعامدىق دەنساۋلىققا تونەتىن ەلەۋلى قاۋىپ رەتىندە تانىلدى.

دۇنيەجۇزىلىك دەنساۋلىق ساقتاۋ ۇيىمىنىڭ (د د س ۇ) مالىمەتىنشە، الەمدە ءار ساعات سايىن جالعىزدىقپەن بايلانىستى سەبەپتەردەن شامامەن 100 ادام كوز جۇمادى. بۇل جىلىنا 871 مىڭنان استام ادام دەگەن ءسوز.
جالعىزدىق كەز كەلگەن جاستاعى ادامعا اسەر ەتۋى مۇمكىن، دەگەنمەن ەڭ وسال توپ - جاسوسپىرىمدەر، جاستار جانە تابىسى تومەن نەمەسە ورتاشا ەلدەردىڭ تۇرعىندارى. دەرەكتەرگە سايكەس، 13 پەن 29 جاس ارالىعىنداعى جاستاردىڭ %17-21 ى جالعىزدىقتى ۇنەمى سەزىنەدى. بۇل ماسەلە اسىرەسە جاسوسپىرىمدەر اراسىندا وتە وزەكتى. تابىسى تومەن ەلدەردە جالعىزدىق دەڭگەيى %24 عا جەتسە، بۇل تابىسى جوعارى ەلدەردەگىدەن ەكى ەسە كوپ (شامامەن %11).
- بۇگىنگى زاماندا شەكسىز بايلانىس مۇمكىندىكتەرىنە قاراماستان، وقشاۋلانۋ مەن جالعىزدىققا ۇشىرايتىن ادامدار كوبەيىپ بارادى. جالعىزدىق پەن الەۋمەتتىك وقشاۋلانۋ ادامعا، وتباسىنا جانە تۇتاس قوعامعا زيان كەلتىرەتىن قۇبىلىستار. ەگەر ءبىز ەش ارەكەت جاساماساق، بۇل جاعداي دەنساۋلىق ساقتاۋ، ءبىلىم بەرۋ جانە ەڭبەكپەن قامتۋ سالالارىنداعى شىعىنداردى ارتتىرا وتىرىپ، قوعامعا ميللياردتاعان شىعىن كەلتىرە بەرەدى، - دەدى د د س ۇ باس ديرەكتورى تەدروس ادحانوم گەبرەيەسۋس.
زەرتتەۋ اۆتورلارىنىڭ ايتۋىنشا، الەۋمەتتىك بايلانىس ادام ءومىرىنىڭ بارلىق كەزەڭىندە دەنساۋلىققا وڭ اسەر ەتەدى. ولار اعزاداعى قابىنۋ پروتسەستەرىن ازايتىپ، اۋىر سىرقاتتار ءقاۋپىن تومەندەتەدى، پسيحيكالىق ساۋلىقتى قولداپ، مەرزىمىنەن بۇرىن ءولىمنىڭ الدىن الادى.
ال جالعىزدىق ينسۋلت، جۇرەك- قان تامىرلارى اۋرۋلارى، ديابەت، كوگنيتيۆتىك بۇزىلىستار مەن مەرزىمىنەن بۇرىن ءولىم قاۋپىن ارتتىرادى. سونداي-اق ولار ادامنىڭ پسيحوەموتسيونالدىق جاي- كۇيىن ناشارلاتىپ، دەپرەسسياعا شالدىعۋ مۇمكىندىگىن ەكى ەسەگە ارتتىرادى. بۇل جاعدايلار مازاسىزدىق بۇزىلىستارىنىڭ، وزىنە زيان كەلتىرۋدىڭ جانە سۋيتسيدتىك ويلاردىڭ پايدا بولۋىنا دا ىقپال ەتۋى مۇمكىن.
ايتا كەتەلىك ددۇ كليمات پەن دەنساۋلىققا قاتىستى جاڭا كوميسسيا قۇرعان ەدى.