سىبايلاس جەمقورلىقتان تاركىلەنگەن اقشاعا 89 مەكتەپ سالىنىپ جاتىر
استانا. KAZINFORM - مەملەكەت باسشىسىنىڭ تاپسىرماسى بويىنشا سىبايلاس جەمقورلاردان تاركىلەنگەن بارلىق قارجى الەۋمەتتىك قاجەتتىلىكتەرگە باعىتتالۋدا. بۇل تۋرالى سىبايلاس جەمقورلىققا قارسى قىزمەتتىڭ رەسمي وكىلى دانيار بيگايداروۆ ايتتى.
«ءبىلىم بەرۋ ينفراقۇرىلىمىن قولداۋ قورى» ارقىلى قايتارىلعان 153,3 ميلليارد تەڭگەدەن 89 مەكتەپتىڭ قۇرىلىسىنا قارجى ءبولىندى. ناتيجەسىندە ەلىمىزدىڭ ءتۇرلى وڭىرلەرى مەن ءىرى قالالارىندا 100 مىڭعا جۋىق وقۋشى ورنى جاساقتالدى.
− وسى 89 مەكتەپتىڭ 61- ءى سالىنىپ، پايدالانۋعا بەرىلدى، ونىڭ 29-ى اۋىلدىق جەرلەردە ورنالاسقان. بۇل شارا 6 ءۇش اۋىسىمدى، 2 اپاتتى جانە 1 توزىعى جەتكەن مەكتەپتىڭ ماسەلەسىن شەشۋگە مۇمكىندىك بەردى، − دەدى د. بيگايداروۆ سىبايلاس جەمقورلىققا قارسى قىزمەتتە وتكەن بريفينگتە.
وتكەن جىلى 25 جاڭا مەكتەپ سالىندى، ولاردىڭ باسىم بولىگى استانا قالاسىندا، سونداي-اق ماڭعىستاۋ، الماتى جانە جامبىل وبلىستارىندا ورنالاسقان. بيىل 22 مىڭ وقۋشىعا ارنالعان تاعى 28 مەكتەپتىڭ قۇرىلىسىن جۇرگىزۋ جوسپارلانعان. بارلىق ءبىلىم بەرۋ ۇيىمدارى زاماناۋي جابدىقتارمەن قامتاماسىز ەتىلىپ، وقۋشىلار ءۇشىن قولايلى جاعداي جاسالعان.
سونىمەن بىرگە، «ارناۋلى مەملەكەتتىك قور» ارقىلى دا الەۋمەتتىك نىساندار قۇرىلىسى قارجىلاندىرىلعان. بۇل قور مەملەكەت مەنشىگىنە قايتارىلعان مۇلىكتى ساتۋدان تۇسكەن قاراجات ەسەبىنەن جانە سىبايلاس جەمقورلىققا قارسى قىزمەت كۇشتەرى ارقىلى تولىقتىرىلادى.
قاراجاتتىڭ ءبىر بولىگى اۋىلدىق جەرلەردەگى 7 مەكتەپتى (اتىراۋ، تۇركىستان وبلىستارىندا، جەتىسۋ جانە ۇلىتاۋ وبلىستارىندا)، 2 سپورت كەشەنىن (اقمولا جانە الماتى وبلىستارىندا)، 1 جاتاقحانانى (شىمكەنت قالاسىندا) جانە 2 بالاباقشانى (اقتوبە جانە پەتروپاۆل قالالارىندا) قوسا العاندا، 12 نىسان سالۋعا باعىتتالدى.
سونىمەن قاتار، ەلوردادا ارنايى مەملەكەتتىك قور قاراجاتىنا ق. مۇڭايتپاسوۆ اتىنداعى 3598 ورىندىق جاڭا ستاديون سالىنادى.
سونداي-اق دەنساۋلىق ساقتاۋ سالاسىنداعى 105 نىسان (ريددەر قالاسىنداعى كوپ فۋنكسيونالدى اۋرۋحانا كەشەنى، جەدەل جاردەم ستانسيالارى، مەديتسينالىق پۋنكتتەر، دارىگەرلىك امبۋلاتوريالار، زەرتحانالار)، 162 سۋمەن جابدىقتاۋ جۇيەلەرى (سۋ قۇبىرى جانە تاراتۋ جەلىلەرى، سۋ تارتۋ جانە قىسىم-رەتتەۋ قۇرىلىستارى) ماقۇلداندى.
ارنايى مەملەكەتتىك قوردان ەلىمىزدىڭ ءتۇرلى وڭىرلەرىندە 223,9 ميلليارد تەڭگەگە 280-گە جۋىق الەۋمەتتىك ماڭىزى بار نىسانداردى ينۆەستيتسيالاۋعا قولداۋ كورسەتىلگەن.
اۆتور
ايجان سەرىكجان قىزى
